ములుగు స్కూల్ టీచర్ విద్యార్థులకు పొలంలో వ్యవసాయ పాఠాలు

ములుగు జిల్లా వెంకటాపురం మండలం మరికాల కొత్తూరు ప్రభుత్వ స్కూల్ ఉపాధ్యాయుడు విజయ్ విద్యార్థులకు వ్యవసాయం నేర్పించాడు. పిల్లలకు పుస్తక పాఠాలతో పాటు జీవిత పాఠాలు నేర్పాలన్న ఉద్దేశంతో ఆయన స్కూల్ సమీపంలోని పొలానికి విద్యార్థులను తీసుకెళ్లాడు.

ఈ సందర్భంగా విద్యార్థులు పొలంలో వరినాట్లు వేశారు. నారు పోయడం నుంచి పంట కోసే వరకు రైతులు చేసే పనులను విజయ్ వివరించాడు. రైతుల కష్టం, సాగు విధానాలు ప్రత్యక్షంగా విద్యార్థులకు తెలియజేశాడు.

విజయ్ మాట్లాడుతూ, విద్యార్థులు కేవలం పుస్తకాల్లోని పాఠాలు చదవడమే కాకుండా, తల్లిదండ్రులు, రైతులు పడే కష్టం అర్థం చేసుకోవాలని తెలిపాడు. అందుకే ఒక్కరోజు పొలంలో నాట్లు వేయించి, రైతుగా జీవించే అనుభవం కల్పించానని చెప్పాడు.

విద్యార్థులు సైతం ఈ అనుభవంతో సంతోషం వ్యక్తం చేశారు. ఒక విద్యార్థి రోజూ క్లాస్ రూమ్‌లో కాకుండా పొలంలో నేర్చుకోవడం బాగుందని, ఒక్కరోజు నాట్లు వేయడంతో కాళ్ల నొప్పులు వచ్చాయని, రైతులు ప్రతిరోజూ ఇలా ఎన్నో కష్టాలు పడతారని తెలుసుకున్నామని అన్నాడు.

ఈ కార్యక్రమంలో విద్యార్థులు, రైతులు, గ్రామస్థులు పాల్గొన్నారు.