ముంబై, గుజరాత్‌లో భారీ వర్షాలు; NDRF బృందాల మోహరింపు, రెడ్ అలర్ట్

మహారాష్ట్రలోని ముంబై, చుట్టుపక్కల జిల్లాలను భారీ వర్షాలు ముంచెత్తాయి. రవాణా వ్యవస్థ స్తంభించడంతో జనజీవనం అస్తవ్యస్తంగా మారింది. అధికారులు NDRF బృందాలను రంగంలోకి దించారు.

దాదర్, వసాయి, బాంద్రా, నవీ ముంబై ప్రాంతాల్లో కుండపోత వర్షం కురిసింది. వసాయిలో లోతట్టు ప్రాంతాలు మునిగిపోయి, కార్లు నీటిలో చిక్కుకున్నాయి. ఇళ్లల్లోకి వరద నీరు ప్రవేశించింది. దాదర్లోని మీనాతాయి పూల మార్కెట్ షెడ్డుపై భారీ చెట్టు కూలింది; విద్యుత్ సరఫరా నిలిపి, చెట్టును తొలగించే పనులు చేపట్టారు.

రత్నగిరి జిల్లాలోని జగబూడి నది ప్రమాదకర స్థాయిని మించి ప్రవహిస్తోంది. అరుణావతి నది కూడా ఉగ్రరూపం దాల్చింది. ఈ నేపథ్యంలో, ముంబై, రాయగడ్, ఠాణే, పాల్గర్, రత్నగిరి, సింధుదుర్గ జిల్లాలకు IMD రెడ్ అలర్ట్ జారీ చేసింది. రాబోయే మూడు రోజులపాటు భారీ వర్షాలు కురిసే అవకాశం ఉందని, ప్రజలు అప్రమత్తంగా ఉండాలని సూచించింది. పూణె, సతారా, నాసిక్ ఘాట్ ప్రాంతాల్లోనూ భారీ వర్షాలు కురిసే అవకాశం ఉంది.

ముంబై శివార్లలోని భివాండిలో భారీ వర్షానికి రవాణా నిలిచిపోయింది. డ్రైనేజీ వ్యవస్థ సరిగ్గా లేదని, రోడ్లు నదుల్లా మారాయని MNS నేత మహేంద్ర భానుశాలి రోడ్డుపై ఈత కొట్టి నిరసన తెలిపారు.

గుజరాత్లోని సౌరాష్ట్ర, దక్షిణ గుజరాత్ ప్రాంతాల్లో ఎడతెరిపి లేని వర్షాలు కురుస్తున్నాయి. రాజ్కోట్లో రోడ్లు జలమయమై, రాకపోకలకు ఆటంకం కలిగింది. గత మూడు రోజులుగా వర్షాలు కొనసాగుతున్నాయి.