ముంబై భారీ వర్షాలు: 3 రోజుల్లో 4 మృతి, రెడ్ అలర్ట్ కొనసాగింపు

ముంబైలో ఎడతెరిపి లేని వర్షాలు మూడు రోజుల్లో నలుగురి ప్రాణాలు తీసింది. చెట్టు కూలి 11 ఏళ్ల బాలుడు, తెరిచి ఉన్న మ్యాన్హోల్‌లో పడి ఓ వ్యక్తి, మోటార్ సైకిల్‌పై ప్రయాణిస్తుండగా కొబ్బరి చెట్టు కూలి మరో వ్యక్తి మృతి చెందారు. పూణేలో వర్షపు నీటితో నిండిన గుంతలో పడి రెండేళ్ల బాలుడు ప్రాణాలు కోల్పోయాడు.

గత 24 గంటల్లో పలు ప్రాంతాల్లో 10 సెం.మీ. కంటే ఎక్కువ వర్షపాతం నమోదైంది. రోడ్లన్నీ నీటమునిగి ట్రాఫిక్‌కు తీవ్ర అంతరాయం కలిగింది. లోకల్ రైళ్లు షెడ్యూల్ కంటే ఆలస్యంగా నడుస్తున్నాయి. లోతట్టు ప్రాంతాలు జలదిగ్బంధంలో ఉండగా, ప్రజలు తీవ్ర ఇబ్బందులు ఎదుర్కొంటున్నారు.

ఐఎండీ హెచ్చరికల మేరకు రాబోయే 48 గంటల్లో ముంబైలో అతి భారీ వర్షాలు కురిసే అవకాశం ఉంది. గంటకు 50-60 కి.మీ. వేగంతో ఈదురుగాలు వీచవచ్చని అంచనా వేసింది. మరాఠవాడలోని కొన్ని ప్రాంతాల్లో ఈ నెల 7 వరకు ఉరుములు, మెరుపులతో కూడిన వర్షాలు కొనసాగుతాయని తెలిపింది.

అధికారులు రెడ్ అలర్ట్ కొనసాగిస్తూనే విద్యా సంస్థలకు ఇప్పటికే ప్రకటించిన సెలవులను మరో రోజు పొడిగించారు. అత్యవసరమైతే తప్ప బయటకు రావద్దని, ఇళ్లలోనే సురక్షితంగా ఉండాలని ప్రజలకు సూచించారు.