ముంబైలో ముహర్రం ఊరేగింపుపై భారీ విష ప్రయోగం విఫలం; 14,900 టాక్సిక్ క్యాప్సూల్స్ స్వాధీనం

ముంబై పోలీసులు ముహర్రం ఊరేగింపుపై జరగబోతున్న సామూహిక విషప్రయోగాన్ని విఫలం చేశారు. ఈ విష ప్రయత్నంలో భాగంగా ఫయాజ్ ప్రేమ్ జీ అనే వ్యక్తిని అరెస్టు చేసి, అతని నుంచి 14,900 జింక్ ఫాస్ఫైడ్ క్యాప్సూల్స్ స్వాధీనం చేసుకున్నారు. జింక్ ఫాస్ఫైడ్ అనేది ఎలుకల విషంగా ఉపయోగించే అత్యంత విషపూరిత రసాయనం. పోలీసులు అందించిన వివరాల ప్రకారం, నిందితుడు ఫయాజ్ దాదాపు 50 కిలోల జింక్ ఫాస్ఫైడ్ సేకరించి, ప్రతి క్యాప్సూల్‌లో ఒక గ్రాము చొప్పున నింపి, సుమారు 30,000 వరకు విష క్యాప్సూల్స్ తయారు చేస్తున్నాడు. ముహర్రం ఊరేగింపు ముంబైలోని బైతులా పోలీస్ స్టేషన్ పరిధిలో వెళుతున్న సమయంలో, ఫయాజ్ ఈ క్యాప్సూల్స్‌ను నొప్పి నివారిణి మాత్రలుగా నటిస్తూ అమ్మేందుకు ప్రయత్నించాడు. అనుమానాస్పదంగా సంచరిస్తున్న అతడిని గుర్తించిన పోలీసులు ప్రశ్నించగా, కిటుకు బయటపడింది. నిందితుడు ఈ క్యాప్సూల్స్ ఆన్‌లైన్‌లో 3,000 ఆర్డర్ చేసినట్లు, అలాగే 50 కిలోల విష రసాయనాన్ని కూడా కొనుగోలు చేసినట్లు దర్యాప్తులో తేలింది. పోలీసులు అతని మొబైల్ ఫోన్, ఆర్థిక లావాదేవీలు, పరిచయస్తులను పరిశీలిస్తున్నారు. అదనంగా, ఫయాజ్ అనేకసార్లు ఇరాన్, ఇరాక్ దేశాలకు చేసిన పర్యటనలపై కూడా దర్యాప్తు జరుగుతోంది. అతను ఒంటరిగా ఈ కుట్రకు పాల్పడ్డాడా లేదా పెద్ద నెట్‌వర్క్‌తో సంబంధాలు ఉన్నాయా అన్న కోణంలో విచారణ కొనసాగుతోంది. సామూహిక విష ప్రయోగాన్ని సకాలంలో భగ్నం చేసిన పోలీసుల చర్యలతో పెను ప్రమాదం తప్పింది.