హైదరాబాద్ ఐవీఎఫ్ అక్రమాలు: 58 మంది యువతుల రక్షణ, 20 సెంటర్లకు నోటీసులు

హైదరాబాద్‌లో ఐవీఎఫ్ కేంద్రాల పేరిట జరుగుతున్న అక్రమ అండాల సేకరణపై మల్కాజిగిరి పోలీసులు దర్యాప్తు వేగవంతం చేశారు. ఈ కేసులో ఇప్పటివరకు 58 మంది యువతులను రక్షించారు. మొత్తం 20 ఫెర్టిలిటీ సెంటర్లకు పోలీసులు నోటీసులు జారీ చేశారు.

నకిలీ ఆధార్ కార్డులు తయారు చేస్తున్న ప్రవీణ్‌ను పోలీసులు అరెస్టు చేసి రిమాండ్‌కు పంపారు. ఉద్యోగం కోసం హైదరాబాద్‌కు వచ్చిన యువతులను వర్కింగ్ ఉమెన్స్ హాస్టల్ పేరుతో ఉంచి, బలవంతంగా అండాలు సేకరిస్తున్నట్టు దర్యాప్తులో తేలింది. మెడికల్ డిపార్ట్‌మెంట్ అనుమతి లేకుండానే ఈ సేకరణ జరిగినట్టు అధికారులు గుర్తించారు.

బేగంపేటలో బయటపడిన ఈ వ్యవహారంపై గత నెల 30న పోలీసులు దాడులు చేశారు. ఆ సమయంలో 58 మంది యువతులను రక్షించి సంరక్షణ కేంద్రానికి తరలించారు. ముంబై, ఢిల్లీ, కోల్‌కతా, చెన్నైలోని స్లమ్ ప్రాంతాల నుంచి యువతులను తీసుకువచ్చినట్టు విచారణలో తేలింది. హైదరాబాద్‌లో మంచి ఉద్యోగం ఇప్పిస్తామని చెప్పి బ్రోకర్లు వారిని మోసం చేసినట్టు పోలీసులు చెప్తున్నారు.

ఈ కేసులో అమిత్ శర్మ, దుర్గా ప్రసాద్ కీలక వ్యక్తులుగా పోలీసులు గుర్తించారు. ఐవీఎఫ్ సెంటర్లు ఒక్కో డోనర్ నుంచి అండాలు తీసుకున్నందుకు ₹3 లక్షలు చెల్లిస్తుండగా, ఆ మహిళలకు మాత్రం ₹30,000 ఇస్తున్నట్టు విచారణలో బయటపడింది. ఈ మొత్తంలో ఎక్కువ భాగం బ్రోకర్లు, సెంటర్ల మధ్య పంచుకుంటున్నట్టు సమాచారం.

నోటీసులు అందిన 20 సెంటర్లలో హైదరాబాద్ నగరంలోని వాటితో పాటు దేశవ్యాప్తంగా పేరున్న కొన్ని ఐవీఎఫ్ సెంటర్లు కూడా ఉన్నాయి. ఏ డోనర్ నుంచి ఎన్ని అండాలు తీసుకున్నారు, ఎవరి ద్వారా తీసుకున్నారు అనే పూర్తి డేటాను పోలీసులు కోరుతున్నారు. ఈ కేసుపై మహిళా కమిషన్ కూడా విచారణ చేపడుతోంది. ఈ ముఠాలో మరింతమంది ఉన్నట్టు అధికారులు భావిస్తున్నారు. దర్యాప్తు కొనసాగుతోంది.