ముంబైలో భారీ వర్షాలు: 16 మంది మృతి, విమాన-రైలు సేవలకు అంతరాయం

ముంబై నగరంలో ఎడతెరిపి లేకుండా కురిసిన భారీ వర్షాల కారణంగా ఇప్పటివరకు 16 మందికి పైగా మరణించినట్లు అధికారులు తెలిపారు. వర్షాల తీవ్రతతో నగరమంతా స్తంభించింది.

భారత వాతావరణ శాఖ (IMD) ముంబై, రాయగడ జిల్లాలకు రెడ్ అలర్ట్ జారీ చేసింది. గంటకు 80 నుంచి 90 కి.మీ. వేగంతో ఈదురుగాలులు వీచే అవకాశం ఉందని హెచ్చరించింది. ప్రజలు అత్యవసరమైతే తప్ప బయటకు రావద్దని అధికారులు సూచించారు.

భారీ వర్షాలతో ముంబైలో రైలు, విమాన సేవలకు తీవ్ర అంతరాయం ఏర్పడింది. పలు కాలనీలు నీట మునిగాయి. పాఠశాలలు, కళాశాలలకు సెలవులు ప్రకటించారు. ముంబై విశ్వవిద్యాలయం పరీక్షలు వాయిదా పడ్డాయి. డబ్బావాలా సేవలు నిలిచిపోయాయి.

ముంబై-పూణే ఎక్స్‌ప్రెస్ వేపై కొండచరియలు విరిగిపడటంతో రైల్వే ట్రాకులు బురద, రాళ్లతో కూరుకుపోయాయి. కొన్ని చోట్ల వరదలకు పట్టాలు కొట్టుకుపోయాయి.

ముంబై మాంఖుర్ద్ ప్రాంతంలో ఒక ఇల్లు కూలిపోవడంతో ఆరుగురు మృతి చెందారు. మృతుల కుటుంబాలకు మహారాష్ట్ర ముఖ్యమంత్రి ₹5 లక్షల ఆర్థిక సహాయం ప్రకటించారు.

పరిస్థితిని ఎదుర్కొనేందుకు NDRF, విపత్తు నిర్వహణ బృందాలు సిద్ధంగా ఉన్నాయి. సుమారు 15,000 మంది సిబ్బంది సహాయక చర్యల్లో నిమగ్నమవుతారని అధికారులు తెలిపారు. లోతట్టు ప్రాంతాల్లో వరదలు, చెట్లు కూలిపోవడం, విద్యుత్ సరఫరాలో అంతరాయం వంటి ప్రమాదాలున్నాయని మహారాష్ట్ర ప్రభుత్వం హెచ్చరించింది.