మురళీ మోహన్ 61వ వివాహ వార్షికోత్సవం.. అంధ విద్యార్థుల మధ్య వేడుక

హైదరాబాద్‌లోని బేగంపేటలో నిర్వహిస్తున్న స్కూల్ ఫర్ బ్లైండ్‌లో సినీ నటుడు మురళీ మోహన్ తన 61వ వివాహ వార్షికోత్సవాన్ని అంధ విద్యార్థులతో కలిసి జరుపుకున్నారు.

భగవద్గీత శ్లోకాల పారాయణంతో ప్రారంభమైన ఈ కార్యక్రమంలో విద్యార్థులు భక్తిగీతాలు ఆలపించారు. భగవద్గీత ఫౌండేషన్ వ్యవస్థాపకులు గంగాధర శాస్త్రి ముఖ్య అతిథిగా హాజరై విద్యార్థుల ప్రతిభను, చిన్న వయసులోనే గీతా విలువలను అలవర్చుకుంటున్న తీరును అభినందించారు.

మురళీ మోహన్, గంగాధర శాస్త్రి తరగతి గదులను సందర్శించి, బ్రైలీ లిపి ద్వారా పాఠాలు నేర్చుకోవడం, ఆధునిక సాంకేతికతను వినియోగించడం పరిశీలించారు. విద్యార్థులతో మాట్లాడిన మురళీ మోహన్, ‘శారీరక పరిమితులు విజయానికి అడ్డు కావు, ఆత్మవిశ్వాసమే అతి పెద్ద బలం’ అని అన్నారు.

గత 20 ఏళ్లుగా తాను పుట్టిన రోజు, వివాహ వార్షికోత్సవం వంటి వ్యక్తిగత వేడుకలను అంధ, మానసిక వికలాంగ విద్యార్థులతోనే జరుపుకుంటున్నట్లు మురళీ మోహన్ తెలిపారు. పద్మశ్రీ అవార్డు ప్రకటించినందుకు కేంద్ర ప్రభుత్వానికి, ప్రధాని మోదీకి, హోం మంత్రి అమిత్ షాకు, ఆంధ్రప్రదేశ్ ముఖ్యమంత్రి చంద్రబాబు నాయుడుకు ధన్యవాదాలు చెప్పారు.

ఈ కార్యక్రమంలో ఐఐటీ సీటు సాధించి, చదువుకోవడానికి ఆర్థిక స్తోమత లేని విద్యార్థులకు తోడ్పాటు అందిస్తానని మురళీ మోహన్ హామీ ఇచ్చారు. స్కూల్ ఫర్ బ్లైండ్‌లో దాదాపు 600 మంది విద్యార్థులు ఉండగా, 100 మంది డే స్కాలర్లని, మిగిలిన వారికి వసతి, భోజనం కల్పిస్తున్నట్లు పాఠశాల నిర్వాహకులు తెలిపారు.