నాగార్జున సాగర్‌కు వరద ప్రవాహం.. రైతుల్లో ఆశలు

ఎగువ రాష్ట్రాల్లో కురిసిన వర్షాలతో కృష్ణా బేసిన్లో నీటి ప్రవాహం పెరిగింది. ఆల్మట్టి, జూరాల, నారాయణపూర్, శ్రీశైలం ప్రాజెక్టులకు లక్షల క్యూసెక్కుల నీరు వస్తోంది. ఈ నీరు నాగార్జున సాగర్ ప్రాజెక్టుకు కూడా భారీగా చేరే అవకాశం ఉన్నట్లు అధికారులు చెబుతున్నారు.

నల్లగొండ, సూర్యాపేట, ఖమ్మం జిల్లాల్లోని 9 లక్షల ఎకరాల సాగర్ ఆయకట్టుకు నీరందుతుందనే ఆశలు నెలకొన్నాయి. కొద్ది రోజుల్లో ఎడమ కాల్వకు నీరు విడుదల చేస్తామని ప్రాజెక్టు వర్గాలు తెలిపాయి. ఈ వర్షాభావ పరిస్థితిలో రైతులు తీవ్ర నీటి కొరత ఎదుర్కొంటున్నారు. భూగర్భ జలాలు పూర్తిగా తగ్గిపోవడంతో వ్యవసాయం నిలిచిపోయింది.

ఇప్పుడు వరద రాకతో రైతుల్లో ఉత్సాహం నెలకొంది. నీరు అందుబాటులోకి వస్తే తమ పంటలు సాగుచేసుకోవచ్చని ఆశిస్తున్నారు. అయితే నల్లగొండ జిల్లాలో కొందరు రైతులు ప్రభుత్వ విధానాలపై అసంతృప్తి వ్యక్తం చేస్తున్నారు. గతంలో సాగర్ నీటి నిర్వహణలో ప్రణాళిక లేకపోవడం వల్లే డెడ్ స్టోరేజీకి చేరిందని ఆరోపిస్తున్నారు. వీరు కలెక్టరేట్ ఎదుట ధర్నాకు సిద్ధమవుతున్నారు. ప్రభుత్వం సరైన నీటి కేటాయింపు చేపట్టాలని డిమాండ్ చేస్తున్నారు.

ప్రస్తుత వరదలతో సాగర్ ప్రాజెక్టు నిండుతుందని, తద్వారా వ్యవసాయానికి ఊరట లభిస్తుందని నిపుణులు భావిస్తున్నారు. నీటి విడుదల తేదీపై ప్రభుత్వం నిర్ణయం తెలియాల్సి ఉంది.