నల్గొండ జిల్లాలో వరి సాగు భారీగా తగ్గింది; ప్రత్యామ్నాయ పంటల సాగుకు వ్యవసాయ శాఖ అధికారి సూచన

నల్గొండ జిల్లాలో ఎల్నినో ప్రభావంతో వర్షపాతం తగ్గడంతో వరి సాగు గణనీయంగా తగ్గింది. గత సంవత్సరం 5.5 లక్షల ఎకరాల్లో వరి సాగు జరిగితే, ఈ సంవత్సరం కేవలం 2.8 లక్షల ఎకరాలకే పరిమితమైనట్లు జిల్లా వ్యవసాయ శాఖ అధికారి వినోద్ కుమార్ తెలిపారు.

ఆయన స్థానికంగా మాట్లాడుతూ, జిల్లాలో మొత్తం 11.35 లక్షల ఎకరాల సాగు భూమి ఉండగా, దీనిలో 6 లక్షల ఎకరాలు వర్షాధారమని, సాధారణంగా 5.35 లక్షల ఎకరాల్లో వరి సాగవుతుందని చెప్పారు. అయితే ఎల్నినో కారణంగా భూగర్భ జలాలు క్షీణించడం, వరి సీజన్‌కు అనుకూల పరిస్థితులు లేకపోవడంతో రైతులు వరి సాగు విస్తీర్ణం తగ్గించుకుంటున్నారు.

ప్రత్యామ్నాయంగా కంది, పెసలు, మినుములు, ఆముదం, నువ్వులు, కూరగాయలు వంటి ఆరుతడి పంటల సాగు చేయాలని వినోద్ కుమార్ సూచించారు. ఈ పంటలను ఆగస్టు 30 వరకు కూడా వేసుకోవచ్చని, ప్రస్తుతం ఉన్న వాతావరణానికి ఇవి అనుకూలమని ఆయన వివరించారు.

అవగాహన కార్యక్రమాల్లో భాగంగా జూలై 27 నుంచి 29 వరకు నల్గొండ జిల్లాలోని అన్ని 33 మండలాల్లోనూ రైతు వేదికల వద్ద విత్తన మేళాలు నిర్వహిస్తున్నట్లు చెప్పారు. ఈ మేళాల్లో ప్రత్యామ్నాయ పంటల విత్తనాలన్నీ ప్రదర్శించి రైతులకు సాంకేతిక సలహాలు ఇస్తున్నారు.

వర్షాభావ పరిస్థితుల్లో సంప్రదాయ పంటల కంటే ప్రత్యామ్నాయ పంటలతోనే తక్కువ నష్టం వస్తుందని, అన్నదాతలంతా ఆరుతడి పంటల వైపు మొగ్గు చూపాలని వ్యవసాయ శాఖ అధికారి కోరారు.