నల్గొండ ప్రిన్సిపాల్ రూపారెడ్డి హత్య కేసులో నిందితుడి కోసం ఆరు పోలీసు బృందాల గాలింపు

నల్గొండ జిల్లా కొండమల్లెపల్లిలో ప్రిన్సిపాల్ రూపారెడ్డి హత్య కేసులో నిందితుడి కోసం పోలీసులు గాలింపు కొనసాగిస్తున్నారు. ఇప్పటివరకు నిందితుడు పట్టుబడలేదు.

రూపారెడ్డిని 27 సార్లు కత్తితో పొడిచి చంపినట్లు పోలీసులు తెలిపారు. హత్యకు ముందు ఇంటి పరిసరాల్లో ఎరుపు రంగు చొక్కా వేసుకున్న వ్యక్తి అనుమానాస్పదంగా తిరుగుతూ కనిపించాడు. అతనే హత్య చేసి ఉండొచ్చని పోలీసులు అనుమానిస్తున్నారు.

ఆరు పోలీసు బృందాలు దర్యాప్తు చేస్తున్నాయి. 50 చోట్ల CCTV ఫుటేజీని పరిశీలించారు. 100 మందికి పైగా అనుమానితులను ప్రశ్నించినా ఎలాంటి ఆధారం దొరకలేదని పోలీసులు చెప్పారు.

హత్యకు వాడిన ఆయుధం కూడా లభించలేదు. CDR కాల్ డేటా వివరాలను పరిశీలించారు. రూపారెడ్డి కుటుంబం గతంలో రియల్ ఎస్టేట్, వడ్డీ వ్యాపారాలు నిర్వహించినందున ఆ కోణంలోనూ దర్యాప్తు జరుగుతోంది. ఈ క్రమంలో రూపారెడ్డి భర్తను కూడా విచారించినట్లు పోలీసులు తెలిపారు.

ప్రస్తుతానికి కేసులో పురోగతి లేదని పోలీసులు చెబుతున్నారు. త్వరలోనే నిందితుడిని పట్టుకుంటామని వారు పేర్కొన్నారు.