నవంబర్ 8న నరక చతుర్దశి, దీపావళి ఒకే రోజు: పాటించాల్సిన పూజా విధులు

నవంబర్ 8, ఆదివారం నాడు నరక చతుర్దశి, దీపావళి రెండూ ఒకే రోజు వచ్చాయి. ఆ రోజు ఉదయం చతుర్దశి తిథి, రాత్రి అమావాస్య ఉన్నాయి. ఈ రెండు పర్వదినాలకు సంబంధించిన విధులను ఒకే రోజు పాటించాలని శాస్త్రాలు చెప్తున్నాయి.

నరక చతుర్దశి రోజు ఉదయాన్నే అభ్యంగన స్నానం చేయాలి. నువ్వుల నూనెను ఒంటికి, తలకు రాసుకుని తలంటు స్నానం చేయడాన్ని అభ్యంగన స్నానం అంటారు. సూర్యోదయానికి ముందే ఇది చేయడం మంచిది. కుదరకపోతే ఉదయం 7 లేదా 8 గంటల లోపు చేయాలి. ఉత్తరేణి కొమ్మ దొరికితే నీళ్లలో ముంచి తల చుట్టూ తిప్పుతూ స్నానం చేయవచ్చు. నరకాసురుడిని సంహరించిన తర్వాత శ్రీకృష్ణుడు ఇదే రోజు తెల్లవారుజామున అభ్యంగన స్నానం చేశాడని శాస్త్రాలు చెప్తున్నాయి.

లింగ పురాణం ప్రకారం ఆ రోజు మధ్యాహ్నం మినుములతో చేసిన పదార్థాలు తినాలి. మినపగారెలు, మినప సున్ని ఉండలు వంటివి తినడం దోషాలు తొలగడానికి సహాయపడుతుందని చెప్పబడింది. చీకటి పడ్డాక దక్షిణ దిక్కుగా ప్రమిదలో నువ్వుల నూనె పోసి దీపం పెట్టాలి. దీన్ని ఉల్కాదానం అంటారు. ఇంటి యజమాని దక్షిణం వైపు తిరిగి నల్ల నువ్వులు కలిపిన నీటిని యమధర్మరాజుకు తర్పణం ఇవ్వాలి. 'యమాయ నమః, యమం తర్పయామి' అనే మంత్రాన్ని మూడు సార్లు చదవాలి.

దీపావళి రోజు సాయంత్రం గోధుమల దీపం వెలిగించడం ఆచారం. ఇంటి ముందు గోధుమల కుప్పపై పెద్ద మట్టి ప్రమిదలో దీపం పెట్టాలి. గోధుమ పిండి, బెల్లం, ఆవు పాలు కలిపి చేసిన ప్రమిదలోనూ దీపం పెట్టవచ్చు. చీకటి పడ్డాక వెలిగించి కనీసం అర్ధరాత్రి వరకు వెలుగుతూ ఉండేలా చూడాలి. తర్వాత ఆ గోధుమలను ఆవుకు తినిపించవచ్చు, చెట్టు మొదట పోయవచ్చు లేదా పారే నీళ్లలో వదిలేయవచ్చు.

అర్ధరాత్రి 12 గంటలకు అలక్ష్మీ నిస్సరణం చేయాలి. చీపురుతో ఇల్లంతా చిమ్మి, చాటలతో బియ్యం చెరగాలి. రాళ్ల ఉప్పు కలిపిన నీటితో ఇల్లంతా తడిగుడ్డ పెట్టుకోవాలి. ఆ తర్వాత లక్ష్మీదేవి చిత్రపటం దగ్గర దీపం వెలిగించి నిసి పూజ చేయాలి. 108 రూపాయల నాణాలతో లక్ష్మీ అష్టోత్తరం చదువుతారు. మరుసటి రోజు ఆ నాణాలను పసుపు లేదా గులాబీ రంగు వస్త్రంలో మూట కట్టి ధనం ఉంచే బీరువాలో పెట్టుకోవాలి. గత సంవత్సరం వాడిన నాణాలనే మళ్లీ వాడుకోవచ్చు.

దీపావళి రాత్రి లక్ష్మీ హోమం చేస్తే రాజయోగం, ధనలక్ష్మి అనుగ్రహం కలుగుతుందని శాస్త్రాలు చెప్తున్నాయి. హోమం కుదరకపోతే నిసి పూజ చేసినా సరిపోతుంది.