నార్లాపూర్ ప్రాథమిక పాఠశాలలో క్లాస్‌రూమ్ పైకప్పు కూలిన ఘటన: విద్యార్థులు సురక్షితం

నాగర్‌కర్నూల్ జిల్లా కొల్లాపూర్ మండలం నార్లాపూర్ గ్రామంలోని ప్రాథమిక పాఠశాల భవనంలో భాగం కూలింది. క్లాస్‌రూమ్ పైకప్పు విద్యార్థులు ఉన్న సమయంలో ఒక్కసారిగా కూలిపోయింది.

అయితే విద్యార్థులు వెనక సీట్లలో కూర్చోవడం వల్ల ప్రాణాపాయం తప్పింది. ఉదయం ప్రార్థన అనంతరం నాలుగో తరగతి విద్యార్థులు తరగతిలోకి వెళ్లిన కాసేపటికే ఈ ఘటన జరిగింది.

ప్రధాన ఉపాధ్యాయుడు జనార్ధన్ మాట్లాడుతూ, ఈ భవనం సుమారు 70 ఏళ్ల క్రితం నిర్మించారని, పూర్తిగా శిథిలావస్థకు చేరుకుందని తెలిపారు. చెట్ల వేర్లు గోడల్లోకి చొచ్చుకుపోయి డ్యామేజ్ చేశాయని, వర్షాకాలంలో నీళ్లు క్లాస్‌రూమ్‌లోకి వచ్చి బోధనకు అంతరాయం కలుగుతోందని ఆయన వివరించారు.

ప్రభుత్వం స్పందించి స్కూల్‌ను మరోచోటికి మార్చాలని, లేదా భవనాన్ని కూల్చి కొత్తది నిర్మించాలని జనార్ధన్ విజ్ఞప్తి చేశారు. ఈ ఘటనపై స్థానిక అధికారుల స్పందన తెలియాల్సి ఉంది.