హైదరాబాద్‌లో 9.95 లక్షల మంది ఓటర్లు చిరునామాల్లో లభ్యం కాలేదు

హైదరాబాద్ జిల్లాలో దాదాపు 10 లక్షల మంది ఓటర్లు తమ నమోదు చేసిన చిరునామాల్లో లభించలేదు. మొత్తం 47,36,669 మంది ఓటర్లలో 9,95,315 మంది (21%) ప్రస్తుతం చిరునామాల్లో లేరని అధికార వర్గాలు తెలిపాయి.

వీరిలో కొందరు మరణించినవారు కాగా మరికొందరు వలసల కారణంగా ఇతర ప్రాంతాలకు వెళ్లినట్లు భావిస్తున్నారు. ప్రస్తుతం అధికారులు వీరిని 'ఆచూకి తెలియని' జాబితాలో చేర్చారు. నియోజకవర్గాల వారీగా చూస్తే, జూబ్లీహిల్స్‌లో 88,933 మంది అత్యధికంగా, అంబర్‌పేట్‌లో 38,208 మంది అత్యల్పంగా ఈ జాబితాలో ఉన్నారు.

ఈ నెల 10వ తేదీ వరకు ఓటరు ఎన్యుమరేషన్ ఫారాల సమర్పణకు గడువు ఉంది. ఇప్పటివరకు 27,26,655 మంది (57.56%) మాత్రమే ఫారాలు తిరిగి ఇచ్చారు. 4,91,236 మంది (10.37%) ఆన్‌లైన్ ద్వారా ఫారాలు భర్తీ చేశారు. మిగిలిన పెద్ద సంఖ్యలో ఫారాలు రాకపోవడంతో అధికారులు ఆందోళన వ్యక్తం చేస్తున్నారు. గతంలో రెండుసార్లు గడువు పొడిగించినప్పటికీ స్పందన తక్కువగానే ఉంది.

మరోవైపు, ఈసీ కార్యదర్శి ఆదేశాల ప్రకారం, రాజకీయ నేతల ఇళ్లు, మతపరమైన స్థలాలు, సున్నిత ప్రాంతాల్లో పోలింగ్ కేంద్రాలు ఉండకూడదు. ఈ నేపథ్యంలో 94 భవనాల్లోని పోలింగ్ కేంద్రాలను మార్చేందుకు ప్రతిపాదనలు రూపొందించారు.