నీట్ 2026 రీ ఎగ్జామ్ ప్రశాంతంగా ముగింపు; 20 లక్షల మంది హాజరు

నీట్ యూజీ 2026 రీ – ఎగ్జామ్ దేశవ్యాప్తంగా ప్రశాంతంగా ముగిసింది. నేషనల్ టెస్టింగ్ ఏజెన్సీ (NTA) ఈ పరీక్ష విజయవంతంగా నిర్వహించినట్లు ప్రకటించింది.

దేశంలోని 5,440 కేంద్రాలు, విదేశాల్లో 14 కేంద్రాల్లో పరీక్ష జరిగింది. హిందీ, ఇంగ్లీష్ సహా మొత్తం 13 భాషల్లో ఈ పరీక్ష నిర్వహించారు. మధ్యాహ్నం 2 గంటల నుంచి సాయంత్రం 5:15 గంటల వరకు సాధారణ అభ్యర్థులకు, దివ్యాంగులకు సాయంత్రం 6:20 వరకు పరీక్ష సమయం కేటాయించారు.

ఒక నిమిషం ఆలస్యంగా వచ్చిన అభ్యర్థులను కూడా పరీక్ష కేంద్రంలోకి అనుమతించలేదు. దీంతో కొందరు అభ్యర్థులు కన్నీళ్లు పెట్టుకున్న దృశ్యాలు కనిపించాయి.

విద్యార్థుల నుంచి భిన్నమైన స్పందనలు వచ్చాయి. మొత్తంగా ప్రశ్నపత్రం సాధారణంగానే ఉందని చాలా మంది తెలిపారు. అయితే, ఫిజిక్స్ సెక్షన్ చాలా కఠినంగా ఉందని, గత పరీక్షతో పోలిస్తే కొంచెం కష్టంగా అనిపించిందని మరికొందరు విద్యార్థులు చెప్పారు. కెమిస్ట్రీ ప్రశ్నలు మోస్తరుగా ఉండగా, బయాలజీ సులభంగా ఉందని అభిప్రాయపడ్డారు.

NTA ఈ నెల 28న ఆన్సర్ కీ విడుదల చేయనున్నట్లు ప్రకటించింది. అధికారిక వెబ్‌సైట్ నుంచి పీడీఎఫ్ డౌన్‌లోడ్ చేసుకోవచ్చు. ఆన్సర్ కీపై అభ్యంతరాలను కూడా ఇదే వెబ్‌సైట్ ద్వారా తెలియజేయాలి.

ఫలితాల విడుదలకు నెల రోజులకు పైగా సమయం పట్టే అవకాశం ఉంది. వచ్చే నెల చివర్లో నీట్ యూజీ 2026 ఫలితాలు వెలువడతాయని అంచనా.