నెల్లూరు రొట్టెల పండుగ 2026: మూడో రోజు భారీగా హాజరైన భక్తులు, స్వర్ణాల చెరువు వద్ద రొట్టెల మార్పిడి

నెల్లూరులోని బారా షహీద్ దర్గాలో ఐదు రోజుల పాటు జరిగే రొట్టెల పండుగ మూడో రోజుకు చేరింది. గత రాత్రి గంధోత్సవం ముగియడంతో, శనివారం ఉదయం నుంచి భక్తులు పెద్ద సంఖ్యలో తరలివచ్చారు.

దాదాపు దశాబ్దాల చరిత్ర కలిగిన ఈ ఉత్సవంలో భక్తులు ముందుగా 12 మంది షహీదుల సమాధులను దర్శించుకుంటారు. అనంతరం స్వర్ణాల చెరువు వద్దకు వెళ్లి తమ కోరికల కోసం రొట్టెలు మార్చుకుంటారు. తమ కోరిన కోరికలు నెరవేరాలని ప్రత్యేక ప్రార్థనలు చేస్తారు.

ఈ రోజు విశాఖపట్నం, కడప జిల్లా బద్వేల్, విజయవాడ తదితర ప్రాంతాల నుంచి భక్తులు అధిక సంఖ్యలో వచ్చారు. విశాఖకు చెందిన ఒక భక్తుడు మాట్లాడుతూ, తన కొడుకుకు ప్రభుత్వ ఉద్యోగం రావాలని రొట్టె తీసుకున్నానని తెలిపారు. మరో భక్తురాలు గత సంవత్సరం ఉద్యోగం కోసం రొట్టె తీసుకుని ఉద్యోగం వచ్చిందని, ఈసారి మాస్టర్స్ కోసం వచ్చానని చెప్పారు. బద్వేల్ నుంచి 22 ఏళ్లుగా వస్తున్న షేక్ మెహబూబ్ బాషా అనే భక్తుడు గత ఏడాది ఇంటి రొట్టె తీసుకున్నా ఫలితం రాలేదని, ఈసారి నమ్మకంగా వచ్చానని పేర్కొన్నారు.

ఈ ఐదు రోజుల పండుగకు లక్షలాది మంది భక్తులు హాజరవుతారని జిల్లా యంత్రాంగం ముందస్తు అంచనా వేసింది. దూర ప్రాంతాల నుంచి వచ్చే భక్తులకు ఎలాంటి ఇబ్బందులు లేకుండా ఏర్పాట్లు చేసింది.