నెల్లూరులో సముద్రంలో చిక్కుకున్న ఏడుగురు మత్స్యకారులు సురక్షితం

నెల్లూరు జిల్లాలో ఏడుగురు మత్స్యకారులు సముద్రంలో చిక్కుకున్న ఘటనలో సురక్షితంగా రక్షించబడ్డారు. నిజాంపట్నం ప్రాంతానికి చెందిన వీరు చేపల వేటకు వెళ్లగా, తీరానికి 5 కిలోమీటర్ల దూరంలో వారి బోటు నిలిచిపోయింది.

బోగోలు మండలం జువ్వలదిన్నె ఫిషింగ్ హార్బర్ వద్ద ఫైబర్ బోటును మరమ్మతు చేసుకుని మత్స్యకారులు తిరిగి వేటకు వెళ్లారు. తుఫాను ప్రభావంతో సముద్రం అల్లకల్లోలంగా ఉండడంతో బోటు ముందుకు కదలలేకపోయింది. దీంతో వారు స్థానిక మత్స్యకారులకు, తమ కుటుంబ సభ్యులకు సమాచారం ఇచ్చారు.

జువ్వలదిన్నె తీర ప్రాంతంలో మోటార్ ఫైబర్ పడవను స్థానికులు గుర్తించారు. స్థానిక మత్స్యకారులు, రెవెన్యూ అధికారులు, ఫిషరీస్ అధికారులు, మెరైన్ పోలీసులు కలిసి సహాయ చర్యలు చేపట్టారు. అలల ఒత్తిడి ఎక్కువగా ఉండడంతో బోటు దిశ మార్చి, బోగోలు మండలంలోని పాత కడపాలి తీరానికి వారిని సురక్షితంగా చేర్చారు.

నెల్లూరు జిల్లాలో నిన్నటి నుంచి అనేక ప్రాంతాల్లో వర్షాలు కురుస్తున్నాయి. కొత్తకోడూరు, జువ్వలదిన్నె, తూర్పులపాలెం, తుమ్మలపెంట తీర ప్రాంతాల్లో బలమైన ఈదురుగాలులు వీస్తున్నాయి. సముద్రం అల్లకల్లోలంగా ఉంది.

ప్రస్తుతం ఏడుగురు మత్స్యకారులు క్షేమంగా ఉన్నారని అధికారులు తెలిపారు.