నిమ్స్ హాస్పిటల్ 2.5 ఏళ్లలో 1,000 రోబోటిక్ సర్జరీల మైలురాయి

నిమ్స్ హాస్పిటల్ రెండున్నరేళ్లలో 1,000 రోబోటిక్ సర్జరీలు విజయవంతంగా పూర్తి చేసి మైలురాయిని చేరుకుంది. ఈ విషయాన్ని నిమ్స్ డైరెక్టర్ డాక్టర్ రాహుల్ దేవరాజ్ తెలిపారు.

డాక్టర్ రాహుల్ దేవరాజ్ సచివాలయంలో ఆరోగ్య శాఖ మంత్రి దామోదర్ రాజనరసింహను కలిసి ఈ ఘనతను వివరించారు. మంత్రి ఈ సందర్భంగా రోబోటిక్ సర్జరీల్లో పాల్గొన్న వైద్యులు, నర్సింగ్ అధికారులు, సిబ్బందిని అభినందించారు.

ఇటీవల నిమ్స్‌లో 2,000 కిడ్నీ మార్పిడి శస్త్ర చికిత్సలు పూర్తవగా, ప్రస్తుతం 1,000 రోబోటిక్ సర్జరీల మైలురాయిని చేరుకుంది. దక్షిణ భారత ప్రభుత్వ వైద్యరంగంలో తొలి రోబోటిక్ కిడ్నీ ట్రాన్స్‌ప్లాంట్ నిర్వహించిన నిమ్స్, దేశంలోని ప్రముఖ అవయవ మార్పిడి కేంద్రాల్లో ఒకటిగా నిలిచింది.

ప్రభుత్వ ఆస్పత్రుల్లో అత్యాధునిక వైద్య సేవలు ప్రజలకు అందించడంలో నిమ్స్ కీలక పాత్ర పోషిస్తోందని మంత్రి దామోదర్ రాజనరసింహ పేర్కొన్నారు. ప్రభుత్వ వైద్యరంగం సామర్థ్యాన్ని ఇది చూపిస్తోందన్నారు.