నీతా అంబానీకి అమెరికాలో AAPI మానవతా పురస్కారం

నీతా అంబానీకి అమెరికాలో ప్రతిష్ఠాత్మక AAPI మానవతా పురస్కారం లభించింది. అమెరికన్ అసోసియేషన్ ఆఫ్ ఫిజీషియన్స్ ఆఫ్ ఇండియన్ ఆరిజిన్ (AAPI) 2026 సంవత్సరానికి గాను ఈ అవార్డును ప్రదానం చేసింది. కనెక్టికట్ రాష్ట్రంలోని న్యూహెవెన్ నగరంలో జరిగిన వార్షిక సదస్సులో ఆమె ఈ పురస్కారాన్ని అందుకున్నారు. ఆరోగ్య సంరక్షణ రంగంలో ఆమె చేస్తున్న కృషికి గుర్తింపుగా ఈ అవార్డు ఇచ్చినట్టు నిర్వాహకులు తెలిపారు.

పురస్కార స్వీకారోపన్యాసంలో ఆమె 34 ఏళ్ల క్రితం అదే న్యూహెవెన్ నగరంలోని ఓ ఆసుపత్రిలో తన కవలలైన ఈషా, ఆకాష్ ల జననాన్ని గుర్తుచేసుకున్నారు. ఆ సమయంలో తనకు దక్కిన వైద్య సిబ్బంది సంరక్షణ, నర్సుల మానవీయత, డాక్టర్ ప్రశాంతంగా వ్యవహరించిన తీరు తనను ఎంతగానో ఆకట్టుకున్నాయని పేర్కొన్నారు. ఆరోగ్య సంరక్షణను ఒక భావోద్వేగంగా అర్థం చేసుకోవడానికి ఈ అనుభవమే కారణమన్నారు. ఆ అనుభవం ఇప్పటికీ తన మనసులో ముద్రితమై ఉందని చెప్పారు.

నీతా అంబానీ రిలయన్స్ ఫౌండేషన్ అధ్యక్షురాలిగా ఆరోగ్యం, విద్య, గ్రామీణాభివృద్ధి రంగాల్లో విస్తృత సేవలందిస్తున్నారు. ఈ కార్యక్రమంలో భారతీయ అమెరికన్ వైద్యులు పెద్ద సంఖ్యలో పాల్గొన్నారు.