నిజామాబాద్‌లో భర్త హత్య: సెలైన్‌లో టాయిలెట్ క్లీనర్ కలిపి హతమార్చిన భార్య

నిజామాబాద్‌లో ఓ మహిళ తన భర్తను హత్య చేసినట్లు పోలీసులు ఆరోపిస్తున్నారు. సెలైన్ బాటిల్‌లో టాయిలెట్ క్లీనర్ కలిపి ఆయన నరాల్లోకి ఎక్కించి హతమార్చినట్లు పేర్కొంటున్నారు.

మృతుని కుటుంబ సభ్యుల ఫిర్యాదు మేరకు దర్యాప్తు చేపట్టగా, ఈ ఘటన వెలుగులోకి వచ్చింది. నిందితురాలు సంధ్య అని, ఆమె అక్రమ సంబంధం కారణంగా భర్తను అడ్డుగా భావించి ఈ హత్య చేసినట్లు పోలీసులు తెలిపారు.

పోలీసుల కథనం ప్రకారం, నిందితురాలు తన స్నేహితుడు సాయి సాయంతో భర్తకు మద్యం ఇప్పించి, మేడపై నుంచి తోసేయించాలని ప్రయత్నించింది. కిందపడి తీవ్ర గాయాలపాలైన భర్త ప్రాణాలతో ఉండడంతో, ఆసుపత్రి నుంచి ఇంటికి తీసుకువచ్చి సెలైన్ ఎక్కిస్తున్న సమయంలో టాయిలెట్ క్లీనర్ మందు కలిపి హత్య చేసినట్లు చెబుతున్నారు.

ఈ కుట్రకు సంబంధించిన ఆడియో వైరల్ కావడంతో కేసు సంచలనంగా మారింది. ఈ కేసులో నిందితురాలితో పాటు సాయి అనే వ్యక్తిని కూడా పోలీసులు అరెస్ట్ చేసి దర్యాప్తు కొనసాగిస్తున్నారు.