భారీ వర్షంతో నోయిడా ఎయిర్‌పోర్ట్ పార్కింగ్ రోడ్డు నీటమునిగింది.. నిర్మాణ నాణ్యతపై ప్రశ్నలు

ఉత్తరప్రదేశ్‌లోని నోయిడా అంతర్జాతీయ విమానాశ్రయం (జేవార్)లో భారీ వర్షం పార్కింగ్ రోడ్డును నీటముంచింది. ఒక గంటకు పైగా కురిసిన వర్షానికి టెర్మినల్‌ను కలిపే పార్కింగ్ కనెక్టర్ రోడ్డు పూర్తిగా జలమయమైన దృశ్యాలు సోషల్ మీడియాలో వైరల్ అయ్యాయి.

ఎయిర్‌పోర్ట్ సిబ్బంది వెంటనే స్పందించి, పంపుల సహాయంతో కేవలం 30 నిమిషాల్లోనే నీటిని తొలగించారు. విమానాల రాకపోకలకు ఎలాంటి ఆటంకం కలగలేదని, ప్రయాణికుల కదలికలు సజావుగా కొనసాగాయని అధికారులు స్పష్టం చేశారు.

అయితే, ఈ ఘటనతో ఇటీవలే ప్రారంభమైన ఈ విమానాశ్రయం డ్రైనేజీ, నిర్మాణ నాణ్యతపై తీవ్ర సందేహాలు తలెత్తాయి. నోయిడా విమానాశ్రయం దాదాపు ₹11,000 కోట్ల వ్యయంతో నిర్మించబడింది. కొద్ది నెలల క్రితమే ప్రారంభించిన ఈ ప్రాజెక్టులో, గంటన్నర సేపు భారీ వర్షానికే రోడ్లు నీటమునిగాయి.

వైరల్ వీడియోలపై నెటిజన్లు ‘విమానాశ్రయమా లేక సీ ప్లేన్‌ల కోసమా?’ అంటూ వ్యంగ్యంగా ప్రశ్నిస్తున్నారు. నిపుణులు కూడా ఇంత భారీ మొత్తంలో నిర్మించిన ఎయిర్‌పోర్టులో సరైన మురికినీటి వ్యవస్థ లేకపోవడం ఆందోళన కలిగిస్తోందంటున్నారు.

నోయిడా ఎయిర్‌పోర్ట్ యాజమాన్యం మాత్రం, వాతావరణ పరిస్థితులను నిరంతరం గమనిస్తున్నామని, ప్రయాణికుల భద్రతకే ప్రాధాన్యత ఇస్తున్నామని వివరించింది. నీరు నిలవడానికి గల కారణాలను పరిశీలిస్తున్నామని, ఇలాంటి పరిస్థితి పునరావృతం కాకుండా చర్యలు తీసుకుంటామని అధికారులు తెలిపారు.