గోదావరిలోకి దూకిన AE నూకరాజు కుటుంబం: ముగ్గురు గల్లంతు, మనవడు సురక్షితం

తూర్పు గోదావరి జిల్లా రాజమండ్రి వద్ద గోదావరి నదిలోకి ఒకే కుటుంబానికి చెందిన నలుగురు దూకారు. పంచాయతీ రాజ్ శాఖ AE నూకరాజు, ఆయన భార్య మీనా, కుమార్తె సౌజన్య, మనవడు ఇందులో ఉన్నారు. ఈ ఘటనలో నూకరాజు, మీనా, సౌజన్య గల్లంతయ్యారు. స్థానిక మత్స్యకారులు వెంటనే స్పందించి పదేళ్ల మనవడిని రక్షించారు.

పోలీసులు సమాచారం అందుకున్నాక రాజమండ్రి రోడ్ కం రైల్వే బ్రిడ్జ్ 59వ పిల్లర్ సమీపంలో గాలింపు చర్యలు చేపట్టారు. SDRF సిబ్బంది కూడా గాలింపులో పాల్గొంటున్నారు. పోలీసులు తెలిపిన వివరాల ప్రకారం నూకరాజు పిఠాపురం పంచాయతీ రాజ్ AE గా పనిచేశారు. ఆయన గొల్లపురం పంచాయతీకి బదిలీ అయ్యారు.

ప్రాథమిక దర్యాప్తులో ఇటీవల నూకరాజు కుమారుడు, అల్లుడు మృతి చెందినట్లు తెలిసింది. దీంతో కుటుంబం తీవ్ర విషాదంలో ఉన్నట్లు పోలీసులు భావిస్తున్నారు. ఈ ఘటనకు ముందు నూకరాజు తన AE WhatsApp గ్రూప్‌లో కుటుంబంతో సహా ఆత్మహత్య చేసుకోబోతున్నట్లు ముందుగా సమాచారం ఇచ్చినట్లు తెలుస్తోంది. ఆర్థిక ఇబ్బందులు, కుటుంబ కలహాలు ఉన్నాయా అని కూడా పోలీసులు దర్యాప్తు చేస్తున్నారు.

గల్లంతైన ముగ్గురి కోసం పోలీసులు, SDRF సిబ్బంది గాలింపు చర్యలు కొనసాగిస్తున్నారు.