నవంబర్ 15 స్కంద షష్టి: కార్తీక మాసం ఆరో రోజు పూజలు, ఆచారాలు

నవంబర్ 15 ఆదివారం కార్తీక మాసంలో ఆరో రోజు. ఈ రోజు కార్తీక శుక్ల షష్టి. దీన్ని స్కంద షష్టి అని కూడా పిలుస్తారు. ఈ రోజు సుబ్రహ్మణ్యేశ్వర స్వామికి ప్రత్యేక పూజలు చేస్తారు.

తమిళనాడులోని తిరుచందూరు క్షేత్రంలో ఈ రోజు అసుర సంహార ఉత్సవం జరుగుతుంది. పురాణాల ప్రకారం సుబ్రహ్మణ్య స్వామి సూర పద్మాసురుడిని ఆరు రోజుల పాటు యుద్ధం చేసి ఆరో రోజు సంహరించాడు. యుద్ధంలో ఆ రాక్షసుడు మామిడి చెట్టు రూపం ధరించాడు. పార్వతీదేవి ఇచ్చిన వెలాయుధంతో స్వామి ఆ చెట్టును రెండుగా చీల్చాడు. ఆ శరీరంలో ఒక భాగం నెమలిగా, మరో భాగం కోడిగా మారిందని పురాణాలు చెప్తున్నాయి. నెమలిని స్వామి తన వాహనంగా, కోడిని ధ్వజంగా చేసుకున్నాడని చెబుతారు.

స్కంద అనే పేరుకు శత్రువులను భయపెట్టేవాడు అని అర్థం. అందుకే సుబ్రహ్మణ్య స్వామిని స్కందుడు అని పిలుస్తారు.

ఈ రోజు ఇంట్లో ఆరు ముఖాల సుబ్రహ్మణ్య స్వామి ఫోటో పెట్టుకోవాలి. నువ్వుల నూనె పోసి ఒత్తులు వేసి దీపం వెలిగించాలి. ఎర్రపూలతో పూజ చేసి 'ఓం స్కందాయ నమః' అని 21 సార్లు చదవాలి. తర్వాత దానిమ్మ పండు గింజలను నైవేద్యంగా సమర్పించాలి.

కార్తీక మాసంలో ఆదివారానికి ప్రత్యేక ప్రాధాన్యత ఉంది. స్కాంద పురాణం ప్రకారం ఆదివారం సూర్యోదయానికి ముందు కార్తీక స్నానం చేస్తే, నెల రోజులు స్నానం చేసిన ఫలితం లభిస్తుంది. ఉద్యోగం, వ్యాపారం కారణంగా రోజూ స్నానం చేయలేని వారు ఆదివారం ఒక్కరోజు చేసినా సరిపోతుందని శ్లోకం చెప్తోంది.

ఆరో రోజు పిండి దీపాన్ని దానం చేయాలి. బియ్యప్పిండి, బెల్లం, ఆవుపాలు కలిపి దీపం తయారు చేసి, నూనె లేదా నెయ్యితో వెలిగించి దానం చేయాలి. శివుడికి అభిషేకం చేసేవారు ముందు విభూతి చల్లాలి. నైవేద్యంగా మారేడు, వెలగ, దానిమ్మ పళ్ళలో ఏదైనా సమర్పించవచ్చని శాస్త్రాలు చెప్తున్నాయి.

సుబ్రహ్మణ్యేశ్వర స్వామి ఆలయానికి వెళ్లి ఆలయ ప్రాంగణంలో దీపదానం చేయడం కూడా ఈ రోజు ప్రత్యేకమని భక్తులు నమ్ముతారు.