గిఫ్ట్ సిటీలో ఎన్ఆర్ఐ డిపాజిట్లు $2 బిలియన్లకు చేరిక: IFSCA చైర్మన్

మధ్యప్రాచ్యంలో కొనసాగుతున్న సైనిక ఉద్రిక్తతలు, భౌగోళిక అనిశ్చితి ఉన్నప్పటికీ గిఫ్ట్ సిటీలో ఎన్ఆర్ఐల పెట్టుబడులు వేగంగా పెరిగాయని IFSCA చైర్మన్ కె. రాజరామన్ తెలిపారు. గత కొద్ది నెలల్లో గిఫ్ట్ సిటీ బ్యాంకుల్లో ఎన్ఆర్ఐ ఖాతాదారుల సంఖ్య 9,000 నుంచి 30,000కు చేరగా, రిటైల్ డిపాజిట్ల మొత్తం 2 బిలియన్ డాలర్లు దాటింది. ఆర్బీఐ ఇటీవలే ప్రవేశపెట్టిన FCNR B పథకం కింద గిఫ్ట్ సిటీ బ్యాంకులు ఎన్ఆర్ఐలకు 7 బిలియన్ డాలర్ల లెవరేజ్ అందించాయి.

రాజరామన్ మాట్లాడుతూ, పెట్టుబడిదారులు తమ రిస్క్‌ను తగ్గించుకోవడానికి ఒకే దేశంపై ఆధారపడకుండా విభిన్న మార్గాలను వెతుక్కుంటున్నారన్నారు. విదేశీ మారకంతో లైఫ్, హెల్త్, ఇన్వెస్ట్మెంట్ బీమా ఉత్పత్తులు కూడా గిఫ్ట్ సిటీలో లభిస్తున్నాయి. దీంతో భారీగా ఎన్ఆర్ఐలు ఈ ప్రొడక్ట్స్‌ను వినియోగించుకుంటున్నారు. ప్రపంచవ్యాప్తంగా 7,000 మంది హైనెట్‌వర్త్ వ్యక్తుల నుంచి 220 ఫండ్ మేనేజర్లు 20 బిలియన్ డాలర్ల పెట్టుబడులు సమీకరించారని, ఇందులో 15 బిలియన్లు భారత్‌లో పెట్టుబడి పెట్టినట్లు వెల్లడించారు.

గిఫ్ట్ సిటీలో ప్రత్యామ్నాయ వివాద పరిష్కార కేంద్రం ఏర్పాటుకు సవరణ బిల్లు రాబోయే పార్లమెంట్ సెషన్‌లోనే ప్రవేశపెట్టే అవకాశం ఉందని, వచ్చే ఏడాది కల్లా ఆర్బిట్రేషన్ సెంటర్ అందుబాటులోకి రానుందని చైర్మన్ తెలిపారు. భారతీయ ఎగుమతిదారులకు వాణిజ్య క్రెడిట్‌ను పెంచేందుకు గిఫ్ట్ సిటీ చేస్తున్న కృషికి సంబంధించి, గతేడాది దాదాపు 50.6 బిలియన్ డాలర్ల వర్తక రుణం అందించారని, ఆయా సంస్థలకు వాణిజ్య క్రెడిట్ బీమా కూడా అందుబాటులోకి తీసుకువచ్చామన్నారు.

2031 నాటికి భారత జీడీపీ 8 నుంచి 10 ట్రిలియన్ డాలర్లకు చేరే అంచనా ఉందని, దీంతో విదేశీ రుణాల డిమాండ్ భారీగా పెరిగే అవకాశముందని రాజరామన్ వివరించారు. ప్రస్తుతం గిఫ్ట్ సిటీ నుంచి భారత కార్పొరేట్లకు 61 బిలియన్ డాలర్ల క్రెడిట్ విస్తరించగా, రిజర్వ్ బ్యాంక్ లెక్కల ప్రకారం మొత్తం విదేశీ రుణ పరిమాణం 190 బిలియన్లుగా ఉంది. రాబోయే 5-10 ఏళ్లలో ఈ సంఖ్య వందల బిలియన్లలోకి విస్తరించే అవకాశముందని, భారత ఆర్థిక వ్యవస్థ విస్తరిస్తున్న కొద్దీ గిఫ్ట్ సిటీ అంతర్జాతీయ ఆర్థిక కేంద్రంగా మరింత బలోపేతమవుతుందని పేర్కొన్నారు.