ఒంగోలులో ఇంట్లో చోరీ: 415 గ్రాముల బంగారం, 3 కిలోల వెండి, రూ.7 లక్షల నగదు అపహరణ

ఒంగోలులోని మంగమూరు రోడ్డు సమీపంలోని పార్థసారథి నగర్‌లో భారీ చోరీ జరిగింది. శ్రీనాథ్ అనే వ్యక్తి ఇంట్లో ఈ ఘటన చోటు చేసుకుంది.

శ్రీనాథ్ కుటుంబం గత నెల 30వ తేదీన పుదుచ్చేరి విహార యాత్రకు వెళ్లింది. శనివారం రాత్రి ఇంటికి తిరిగి వచ్చినప్పుడు తలుపులు పగలగొట్టబడి, సామాన్లు చెల్లాచెదురుగా పడి ఉండటం గమనించారు. లోపలికి వెళ్లి చూడగా, దాచి ఉంచిన బంగారు ఆభరణాలు, వెండి వస్తువులు, నగదు మాయమై ఉన్నాయి.

బాధితుడి ఫిర్యాదు ప్రకారం, 415 గ్రాముల బంగారు ఆభరణాలు, 3 కిలోల వెండి వస్తువులు, రూ.7 లక్షల నగదు, 50 కిలోల రాగి బిస్కెట్లు చోరీకి గురయ్యాయి. దొంగలు ఇంటి CCTV కెమెరాలు ధ్వంసం చేయడంతో పాటు DVR తీసుకుని వెళ్లారు. విద్యుత్ లైట్లను కూడా కట్ చేశారు.

సమాచారం అందుకున్న పోలీసులు ఘటనా స్థలానికి చేరుకుని, వేలిముద్రలు సేకరించారు. శ్రీనాథ్ ఇచ్చిన ఫిర్యాదు మేరకు కేసు నమోదు చేసి దర్యాప్తు ప్రారంభించారు. నిందితుల కోసం గాలింపు చర్యలు కొనసాగుతున్నాయి.

శ్రీనాథ్ ఒంగోలు గాంధీ రోడ్‌లోని శివశంకర్ జువెలరీలో పని చేస్తున్నట్లు తెలిసింది. ఘటనపై పోలీసులు దర్యాప్తు ముమ్మరం చేశారు.