కృష్ణ, గుంటూరు, బాపట్ల జిల్లాలకు ఆరెంజ్ అలర్ట్; భారీ వర్ష హెచ్చరిక

ఆంధ్రప్రదేశ్‌లోని కృష్ణ, గుంటూరు, బాపట్ల జిల్లాలకు విపత్తుల నిర్వహణ సంస్థ ఆరెంజ్ అలర్ట్ జారీ చేసింది. ఈ జిల్లాల్లో రాబోయే గంటల్లో భారీ వర్షం కురిసే అవకాశం ఉందని వాతావరణ శాఖ హెచ్చరించింది.

గంటకు 40 నుంచి 50 కిలోమీటర్ల వేగంతో ఈదురుగాలులు వీచే ప్రమాదం ఉంది. ఉరుములు, మెరుపులు, పిడుగులు పడే అవకాశం కూడా ఉన్నట్లు అధికారులు తెలిపారు.

గతంలో విజయవాడ, కాకినాడ ప్రాంతాల్లో వర్షాల కారణంగా చెట్లు, విద్యుత్ స్తంభాలు కూలి ఐదుగురు ప్రాణాలు కోల్పోయిన సంఘటనలు నమోదయ్యాయి. ఈ నేపథ్యంలో చెట్లు, విద్యుత్ స్తంభాలు, హోల్డింగ్స్ కింద నిలబడొద్దని, వర్షం సమయంలో బయటకు రావద్దని ప్రజలకు సూచించారు. రైతులు తమ పంటలను కాపాడుకోవడానికి ముందస్తు జాగ్రత్తలు తీసుకోవాలని అధికారులు కోరారు.

ఉత్తరాంధ్రలోని విశాఖపట్నం, శ్రీకాకుళం, అనకాపల్లి, విజయనగరం, పార్వతీపురం మన్యం జిల్లాల్లో కూడా మోస్తరు నుంచి భారీ వర్షాలు కురిసే అవకాశం ఉంది. రాష్ట్రంలో పలు ప్రాంతాల్లో 44 డిగ్రీల వరకు ఉష్ణోగ్రతలు నమోదవుతున్నాయి. రానున్న రోజుల్లో ఏపీ వ్యాప్తంగా విస్తారంగా వర్షాలు కురిసే అవకాశం ఉన్నట్లు వాతావరణ శాఖ అధికారులు భావిస్తున్నారు.