ఓఆర్ఆర్ ప్రాంతం నుంచి 65% రిజిస్ట్రేషన్ ఆదాయం; ప్రభుత్వ ఖజానాకు ₹9,500 కోట్లు

హైదరాబాద్ ఔటర్ రింగ్ రోడ్ (ORR) పరిసర ప్రాంతాల్లో రియల్ ఎస్టేట్ రంగం వేగంగా విస్తరిస్తోంది. 2025-26 ఆర్థిక సంవత్సరంలో రాష్ట్రవ్యాప్తంగా నమోదైన మొత్తం రిజిస్ట్రేషన్ ఆదాయంలో 65% ఓఆర్ఆర్ ప్రాంతాల నుంచే వచ్చిందని అధికారులు తెలిపారు. ఈ కాలంలో 4,11,987 డాక్యుమెంట్లు రిజిస్టర్ అయ్యాయి. వీటితో ప్రభుత్వానికి ₹9,500 కోట్లకు పైగా ఆదాయం వచ్చింది.

ఓఆర్ఆర్ మెరుగైన రోడ్ కనెక్టివిటీ ఇవ్వడంతో ప్రజలు ఇక్కడ ఇళ్ల కొనుగోలుకు ఎక్కువగా ఆసక్తి చూపుతున్నారు. సబ్ రిజిస్ట్రార్ కార్యాలయాల్లో స్లాట్లు ప్రతిరోజూ నిండిపోతున్నాయి. హైరైజ్ అపార్ట్‌మెంట్లు, విల్లాలు, గేటెడ్ కమ్యూనిటీలపై ప్రజలు ఎక్కువగా మొగ్గు చూపుతున్నారు. ఈ ప్రాంతంలో హైకోర్టు రాబోతుండడం పెట్టుబడులకు మరింత డిమాండ్ తీసుకొచ్చింది. లేఔట్ రెగ్యులరైజేషన్ స్కీం (LRS) గడువును నవంబర్ వరకు ప్రభుత్వం పొడిగించడం కూడా రిజిస్ట్రేషన్ల పెరుగుదలకు దోహదపడింది.

వెస్ట్ హైదరాబాద్‌లో గచ్చిబౌలి, కోకాపేట, నార్సింగి, తెల్లాపూర్ ప్రాంతాలతో ప్రారంభమైన హైరైజ్డ్ కల్చర్ ఇప్పుడు ఘట్‌కేసర్, షామీర్‌పేట, మేడ్చల్ వైపు కూడా విస్తరిస్తోంది. నగరంలో పెరుగుతున్న ట్రాఫిక్, కాలుష్యం, భూముల కొరత కారణంగా జనం నగర శివార్లలో నివాసాలను వెతుక్కుంటున్నారు. స్వచ్ఛమైన గాలి, ప్రశాంత వాతావరణం కోసం గేటెడ్ కమ్యూనిటీలు, విల్లాలు, ఇండిపెండెంట్ ఇళ్లు కొనుగోలు చేస్తున్నారు. రియల్ ఎస్టేట్ బ్రోకర్ల వివరాల ప్రకారం, ఐటీ ఉద్యోగులు, ఎగువ మధ్యతరగతి వర్గాలతో పాటు ఇతర రాష్ట్రాలు, విదేశాల నుంచి పెట్టుబడిదారులు ఓఆర్ఆర్ కారిడార్‌పై పెట్టుబడులు పెడుతున్నారు.

రీజనల్ రింగ్ రోడ్ (RRR), మెట్రో విస్తరణ, రేడియల్ రోడ్లు, కొత్త టౌన్‌షిప్‌లు రానున్న రోజుల్లో అందుబాటులోకి వస్తే నగరం మరింత విస్తరించే అవకాశం ఉందని రియల్ ఎస్టేట్ వర్గాలు అంచనా వేస్తున్నాయి.