వరి సాగులో సమగ్ర యాజమాన్య పద్ధతులపై సంగారెడ్డి KVK సూచనలు

సంగారెడ్డి జిల్లా తెలంగాణ రైతు విజ్ఞాన కేంద్రం (KVK) కోఆర్డినేటర్ అరుణ, ఖరీఫ్ వరి సాగు రైతులకు సమగ్ర యాజమాన్య పద్ధతులపై విలువైన సూచనలు అందించారు. ప్రస్తుతం ఖరీఫ్ నారు నాట్లు చివరి దశలో ఉన్నాయి.

ఎల్నినో ప్రభావం దృష్ట్యా రైతులు వరి భూమిని తగ్గించాలని సూచించారు. 4 ఎకరాల భూమి ఉన్న రైతు ఒక ఎకరంలో మాత్రమే వరి వేసి మిగిలిన భూమిలో ప్రత్యామ్నాయ పంటలు సాగు చేయాలని తెలిపారు.

ముదిరిన నారు నాట్లు వేసే రైతులు నారు వీకడానికి వారం ముందు ఎకరాకి 800 గ్రాముల కార్బో ఫ్యూరాన్ గులికలు వేసి కలపాలని, నారు కొనలను కత్తిరించాలని చెప్పారు. నత్రజని ఎరువు 25 శాతం అదనంగా వేయాలని, ఒక చదరపు మీటర్‌కు 66 కుదుళ్లు ఉండేలా నాట్లు వేయాలని వివరించారు.

ఎరువుల యాజమాన్యంలో ఎకరాకు 40–48 కిలోల నత్రజని, 20 కిలోల భాస్వరం (సింగిల్ సూపర్ ఫాస్ఫేట్), 18 కిలోల పొటాషియం (మ్యూరేట్ ఆఫ్ పొటాష్ 26 కిలోలు) వేయాలన్నారు. భాస్వరం మొత్తం ఆఖరి దుక్కిలో వేయగా, నత్రజనిని మూడు సమాన భాగాలుగా (చివరి దుక్కు, పిలక దశ, అంకురం దశ) వేయాలి. పొటాషియాన్ని రెండు సమ భాగాలుగా (ఆఖరి దుక్కు, అంకురం దశ) వేయాలని సూచించారు.

కాండం తొలిచే పురుగు (స్టెమ్ బోరర్) నివారణకు నారు వీకడానికి వారం ముందు కార్బో ఫ్యూరాన్ గులికలు 800 గ్రాములు/ఎకరా, పిలక దశలో కార్బో ఫ్యూరాన్ 3G గులికలు 10 కిలోలు/ఎకరా, అంకురం నుండి పొట్ట దశ వరకు కార్టాప్ హైడ్రోక్లోరైడ్ 4G గులికలు 8 కిలోలు/ఎకరా వేయాలన్నారు. ఒకవేళ పురుగు కనిపిస్తే కార్టాప్ హైడ్రోక్లోరైడ్ 400 గ్రాములు లేదా క్లోరంత్రో నొలిప్రోల్ 60 మి.లీ./ఎకరా పిచికారీ చేయాలి.

సెప్టెంబర్–నవంబర్ మధ్య సుడిదోమ (బ్రౌన్ ప్లాంట్ హాపర్) ఆశించే ప్రమాదం ఉందని, దీనివల్ల పైరు ఎండిపోయి తాలుగింజలు ఏర్పడతాయని హెచ్చరించారు. ఎకరాకు డైనోఫ్యురాన్ 80 గ్రా., పైమిట్రోజైన్ 120 గ్రా., లేదా ఇమిడాక్లోప్రిడ్ 40–50 మి.లీ. పిచికారీ చేయాలని సూచించారు. కాలిబాట్లు (బండ్లు) సరిగా ఉంచుకోవడం వల్ల కూడా దోమ నుండి ఉపశమనం పొందవచ్చన్నారు.

పంట అధిక దిగుబడికి ఈ యాజమాన్య పద్ధతులు తప్పనిసరి అని శాస్త్రవేత్త అరుణ స్పష్టం చేశారు.