ఆక్వా రైతులకు వరి రైతుల మాదిరి సబ్సిడీలు ఇవ్వాలని జనసేన ఎంపీ పాకా సత్యనారాయణ డిమాండ్

జనసేన రాజ్యసభ సభ్యులు పాకా సత్యనారాయణ కేంద్ర మంత్రి పియూష్ గోయల్‌ను కలిసి ఆక్వా రైతుల సమస్యలపై విజ్ఞప్తి చేశారు. వరి రైతులకు ఇస్తున్న రాయితీల మాదిరిగానే ఆక్వా రంగానికి కూడా యూరియా, పురుగుల మందుల సబ్సిడీలు వర్తింపజేయాలని కోరారు.

ఫీడ్ ధరల పెరుగుదల, రొయ్యల ధరల పతనం వంటి సమస్యలపై కేంద్రం జోక్యం చేసుకోవాలని ఆయన కోరారు. దీనికి ప్రత్యేక రెగ్యులేటరీ అథారిటీని ఏర్పాటు చేయాలని విజ్ఞప్తి చేశారు.

భారతదేశం నుంచి జరిగే ఎగుమతుల్లో 70 శాతం ఆంధ్రప్రదేశ్ నుంచే వస్తాయని, ముఖ్యంగా తూర్పు, పశ్చిమ గోదావరి జిల్లాలు ఎక్కువగా ఆక్వా ఉత్పత్తి చేస్తున్నాయని పాకా సత్యనారాయణ వివరించారు. ఈ సంక్షోభంలో రైతులను ఆదుకోవాలని కోరారు.

పంట రైతులకు యూరియా బస్తాపై రూ.2,000, కిసాన్ సమ్మాన్ నిధి కింద రూ.6,000, ఎన్పీకే ఎరువులపై రూ.800 వంటి రాయితీలు కేంద్రం ఇస్తోందని ఆయన ఉదహరించారు. అదే రకంగా ఆక్వా రైతులకూ ఇవ్వాలనీ, పురుగుల మందులకు కూడా సబ్సిడీ వర్తింపజేయాలని కేంద్ర మంత్రిని కోరారు.