పాలమూరు వర్సిటీలో 'విజన్ ఇండియా-2047' సదస్సు: వేదిక మార్పుపై విమర్శలు, వీసీ వివరణ

పాలమూరు యూనివర్సిటీ నిర్వహించనున్న 'విజన్ ఇండియా-2047' జాతీయ సదస్సుకు సంబంధించి వేదిక మార్పుపై విమర్శలు వ్యక్తమవుతున్నాయి. ఆగస్టు 7, 8 తేదీల్లో కేంద్ర విద్యా మంత్రిత్వ శాఖ సహకారంతో ఈ సదస్సు జరగనుంది. దేశవ్యాప్తంగా వర్సిటీల ఉపకులపతులు సహా పలువురు ప్రముఖులు హాజరుకానున్నారు.

ఈ సదస్సును పాలమూరు వర్సిటీ క్యాంపస్‌లో కాకుండా రంగారెడ్డి జిల్లాలోని కన్హా శాంతివనం అనే ప్రైవేట్ ప్రాంగణంలో నిర్వహించాలన్న నిర్ణయం వివాదాస్పదమైంది. వర్సిటీలో తగిన వసతులు లేవనే ఆరోపణలు వచ్చాయి. అయితే వైస్ ఛాన్సలర్ ప్రొ. జి.ఎన్. శ్రీనివాస్ ఈ ఆరోపణలను ఖండించారు. వచ్చిన అతిథులకు ఎలాంటి ఇబ్బందీ లేకుండా ఒక మెరుగైన వేదికలో నిర్వహించాలనే ఉద్దేశమే తప్ప, ఉద్దేశపూర్వకంగా పాలమూరు ప్రతిష్టను దిగజార్చాలనే ఆలోచన లేదని ఆయన స్పష్టం చేశారు.

ఇలాంటి పెద్ద ఎత్తున జరిగే అంతర్జాతీయ స్థాయి సదస్సుకు కావాల్సిన మౌలిక సదుపాయాలు ప్రస్తుతం యూనివర్సిటీ క్యాంపస్‌లో లేవు. రెగ్యులర్ విద్యార్థి, సిబ్బంది కార్యకలాపాలకు అన్ని వసతులు ఉన్నాయి. కానీ దేశవ్యాప్తంగా వైస్ ఛాన్సలర్ల సమావేశాన్ని నిర్వహించడానికి ప్రత్యేక వసతులు కల్పించాల్సి ఉంటుందని, దీనికి రూ.50 నుంచి రూ.100 కోట్లు ఖర్చు అవుతుందని ఆయన వివరించారు. ఈ సదస్సు 18 ఏళ్ల తర్వాత వచ్చిన అవకాశమని, ఇది రెగ్యులర్ ఈవెంట్ కాదని అందుకే ఆ వ్యయం భరించడం సాధ్యం కాదన్నారు.

విద్యార్థుల అభ్యర్థన మేరకు రెండో రోజు కార్యక్రమాలు పాలమూరు యూనివర్సిటీలోనే నిర్వహించడానికి సిద్ధమని వీసీ తెలిపారు. కన్హా శాంతివనంలో సదస్సు నిర్వహిస్తున్నప్పటికీ, మొత్తం ఈవెంట్ పాలమూరు యూనివర్సిటీ బ్యానర్ కింద, అక్కడి సిబ్బంది ఆధ్వర్యంలోనే సాగుతుందని, ఆ ప్రైవేట్ సంస్థ పేరు ఎక్కడా రిఫ్లెక్ట్ కాదని శ్రీనివాస్ వివరించారు. సోషల్ మీడియాలో తనపై వస్తున్న విమర్శలు బాధ కలిగించాయని, పాలమూరు యూనివర్సిటీ ప్రతిష్ట తనకు పదవి కన్నా ముఖ్యమని ఆయన అన్నారు.