పల్లె సృజన: గ్రామీణ ఇన్నోవేటర్ల ఉత్పత్తుల ప్రదర్శన

రంగారెడ్డి జిల్లా కన్హా శాంతివనంలో పాలమూరు యూనివర్సిటీ నిర్వహించిన రెండు రోజుల జాతీయ సదస్సులో 'పల్లె సృజన' సంస్థ గ్రామీణ ఇన్నోవేటర్ల ఉత్పత్తులను ప్రదర్శించింది.

తూర్పు గోదావరి జిల్లా నిడదపోలుకు చెందిన శ్యాం బాబు మల్లెపూలు అల్లే యంత్రాన్ని తయారు చేశారు. పూల వ్యాపారి పడుతున్న కష్టం చూసి ఆయన ఈ యంత్రం రూపొందించారు.

జెనసిస్ టెక్ సిస్టమ్స్ అనే సంస్థ 'స్మార్ట్ క్యాంపస్ కనెక్ట్' పేరుతో AI ఆధారిత విద్యా వేదికను ప్రదర్శించింది. అడ్మిషన్లు, ఫీ చెల్లింపులు, డిజిటల్ లైబ్రరీ, పరీక్షలు, ఫలితాలు వంటి అన్ని సేవలు ఒకే మొబైల్ యాప్‌లో అందుబాటులో ఉంటాయని సంస్థ ప్రతినిధులు తెలిపారు.

ఖమ్మం జిల్లాకు చెందిన శ్రీనివాస్ 'కిసాన్ రిమోట్' కనిపెట్టారు. రైతులు తమ పొలాల్లోని మోటార్లను 2 కిలోమీటర్ల దూరం నుంచి ఆన్/ఆఫ్ చేసుకోవచ్చు. వోల్టేజ్ హెచ్చుతగ్గుల వల్ల మోటార్లు కాలిపోకుండా, విద్యుత్ ప్రమాదాలు జరగకుండా ఈ పరికరం సహాయపడుతుంది.

గ్రామీణ ప్రాంతాల్లో రోజువారీ సమస్యలకు పరిష్కారాలు చూపే ఇన్నోవేటర్లను 'పల్లె సృజన' ఏకం చేసి మార్కెటింగ్ సహాయం అందిస్తోంది. సదస్సులో సందర్శకులు ఈ ఆవిష్కరణలపై హర్షం వ్యక్తం చేశారు.