ఉప్పల్ భగాయత్ ఫేజ్-2 సమస్యలను సీఎం దృష్టికి తీసుకెళ్తానని పరమేశ్వర్ రెడ్డి ప్రకటన

ఉప్పల్ నియోజకవర్గ కాంగ్రెస్ ఇన్చార్జ్ పరమేశ్వర్ రెడ్డి ఉప్పల్ భగాయత్ ఫేజ్-2 ప్రాంతంలో పాదయాత్ర నిర్వహించారు. కాలనీ వాసులు తమ సమస్యలను ఆయన దృష్టికి తీసుకొచ్చారు.

రహదారి మధ్యలో వేసిన మట్టి కుప్పలు, భూగర్భ డ్రైనేజీ పనులు, మురుగు నీరు, వీధి దీపాలు వంటి సమస్యలు ఉన్నాయని ప్రజలు చెప్పారు. ఫేజ్-1లో మున్సిపల్ కార్పొరేషన్ భవనం, స్విమ్మింగ్ పూల్, కమ్యూనిటీ హాల్ వంటి సౌకర్యాలు ఏర్పాటు చేసినట్లు పరమేశ్వర్ రెడ్డి గుర్తు చేశారు.

ఫేజ్-2లో నెలకొన్న సమస్యలను ముఖ్యమంత్రి రేవంత్ రెడ్డి దృష్టికి తీసుకెళ్తానని, పరిష్కారం కోసం కృషి చేస్తానని తెలిపారు. గత ప్రభుత్వ హయాంలో రైతుల నుంచి భూములు తీసుకున్నప్పటికీ హెచ్ఎండీఏ అభివృద్ధి చేయలేదని, లేఅవుట్‌ను అలాగే వదిలేశారన్నారు.

రైతులకు ఎకరానికి 1000 గజాల స్థలం ఇస్తామన్న హామీ నెరవేరలేదని ప్రజలు చెప్పారు. ప్రస్తుత ప్రభుత్వం ఉప్పల్ భగాయత్‌ను అభివృద్ధి చేసేందుకు సిద్ధంగా ఉందని, సిసి రోడ్లు, అన్ని సౌకర్యాలు కల్పిస్తామని పరమేశ్వర్ రెడ్డి తెలిపారు.