కూతురు నుంచి పేరెంట్స్ మెయింటెనెన్స్ అడగొచ్చా ? చట్టం ఏం చెప్తుంది?

తల్లిదండ్రులు తమ కూతురు నుంచి నిర్వహణ ఖర్చులు (మెయింటెనెన్స్) అడగొచ్చా అనే ప్రశ్నకు సెక్షన్ 125 CrPC (ఇప్పుడు 144 BNSS) కింద స్పష్టమైన నిబంధనలు ఉన్నాయి. చట్టం ప్రకారం, తమను తాము పోషించుకోలేని వృద్ధ తల్లిదండ్రులు పిల్లల నుంచి మెయింటెనెన్స్ కోరవచ్చు.

ఈ చట్టంలో కొడుకులు, కూతుళ్లు ఇద్దరినీ బాధ్యతగా పరిగణిస్తారు. కూతురుకు స్వంతంగా సంపాదన (ఇండిపెండెంట్ ఇన్కమ్) ఉంటేనే తల్లిదండ్రులు ఆమె నుంచి మెయింటెనెన్స్ అడగడానికి అవకాశం ఉంటుంది. అంతేకాక, కూతురు పెళ్లయినప్పటికీ, తన భర్త ఆదాయంపై పూర్తిగా ఆధారపడకుండా సొంతంగా సంపాదిస్తుంటే, తల్లిదండ్రులు ఆమె నుంచి మెయింటెనెన్స్ క్లెయిమ్ చేయవచ్చు.

అదేవిధంగా, మైనర్ పిల్లలు కూడా తల్లిదండ్రుల నుంచి మెయింటెనెన్స్ అడగవచ్చు. శారీరకంగా లేదా మానసికంగా వైకల్యం ఉన్న పెద్ద పిల్లలు (స్పెషల్ చిల్డ్రన్) కూడా తమ మెజారిటీ వచ్చినా మెయింటెనెన్స్ కోసం అర్హులు.

ఇవే కాకుండా, డొమెస్టిక్ వయలెన్స్ యాక్ట్, హిందూ మ్యారేజ్ యాక్ట్ వంటి చట్టాల కింద కూడా నిర్వహణ కోసం దరఖాస్తు చేసుకోవచ్చు. హిందూ మ్యారేజ్ యాక్ట్ ప్రకారం ప్రత్యేక పరిస్థితుల్లో భర్త కూడా భార్య నుంచి మెయింటెనెన్స్ అడిగే అవకాశం ఉంటుంది.

చట్టం ప్రకారం కూతురికి స్వంత ఆదాయం ఉంటే, తల్లిదండ్రుల పోషణ బాధ్యత నుంచి ఆమె మినహాయింపు పొందలేరు. సంపాదన ఉన్న కూతుళ్లు తల్లిదండ్రుల మెయింటెనెన్స్ కోసం చట్టపరంగా బాధ్యత వహిస్తారని న్యాయ నిపుణులు సూచిస్తున్నారు.