ఆన్లైన్, సైబర్ మోసాలపై పార్లమెంట్ సమావేశాల్లో చర్చ జరగాలి: లావు శ్రీకృష్ణదేవరాయులు

నరసరావుపేట TDP ఎంపీ లావు శ్రీకృష్ణదేవరాయులు పార్లమెంట్ వర్షాకాల సమావేశాల్లో సైబర్ మోసాలు, మ్యూల్ ఖాతాల అంశాలపై చర్చ జరగాలని కోరారు. దేశవ్యాప్తంగా పలువురు ప్రజలు తమ సేవింగ్స్ కోల్పోతున్నారని ఆయన ఆందోళన వ్యక్తం చేశారు.

వృద్ధులతో సహా చాలామంది మ్యూల్ ఖాతాల ద్వారా జరిగే ఆన్లైన్ మోసాల వల్ల లక్షలాది రూపాయలు నష్టపోతున్నారని ఎంపీ లావు వివరించారు. జన్ధన్ ఖాతాలు తెచ్చినా భద్రత లేకపోతే ప్రయోజనం లేదని ఆయన అన్నారు.

షెల్ కంపెనీలు తెరిచి మ్యూల్ ఖాతాల ద్వారా నిధులు బదిలీ చేసి వెంటనే కంపెనీలు మూసేస్తున్నాయని, దీనివల్ల వేలమంది మోసపోతున్నారని ఆయన కేంద్రాన్ని కోరారు. ఇలాంటి హవాలా బదిలీలతో దేశానికీ తీవ్ర నష్టం జరుగుతోందని ఎంపీ హెచ్చరించారు.

మ్యూల్ ఖాతాలు, షెల్ కంపెనీలపై కఠిన చర్యలు తీసుకోవాలని, ప్రజల సొమ్ము కాపాడే విధంగా చర్చించాలని కేంద్రం దృష్టికి తీసుకెళ్లినట్టు లావు శ్రీకృష్ణదేవరాయులు తెలిపారు. పార్లమెంట్ వర్షాకాల సమావేశం ఈ నెల 22 నుంచి ప్రారంభమవుతుంది.