పట్టిసీమ నుంచి గోదావరి జలాలు కృష్ణా జిల్లాకు చేరాయి; రైతుల హర్షం

పట్టిసీమ ఎత్తిపోతల పథకం ద్వారా గోదావరి జలాలను కృష్ణా డెల్టాకు విడుదల చేశారు. జూలై 8వ తేదీ ఉదయం నుంచి 20 పంపులు ప్రారంభించి 7,080 క్యూసెక్కుల నీటిని కుడి కాలువ ద్వారా విడుదల చేశారు.

ఈ నీరు ఈ రోజు (జూలై 9) కృష్ణా జిల్లా రంగన్నగూడెం వద్దకు చేరడంతో అక్కడి రైతులు, సాగునీటి సంఘాల నాయకులు జలహారతి ఇచ్చి స్వాగతం పలికారు. ఈ సాయంత్రానికి పవిత్ర సంగమం వద్ద ఈ గోదావరి జలాలు కృష్ణా నదిలో కలుస్తాయని అధికారులు తెలిపారు.

ఎల్‌నినో ప్రభావంతో కృష్ణా బేసిన్‌లో వర్షాలు తగ్గి నీటి మట్టాలు తగ్గిన నేపథ్యంలో ఈ నీటి విడుదల కృష్ణా డెల్టా రైతులకు ఊరట కలిగించింది. పశ్చిమ గోదావరి, కృష్ణా, గుంటూరు, ప్రకాశం జిల్లాల్లోని సుమారు 13 లక్షల ఎకరాల ఆయకట్టుకు ఈ నీరు ఉపయోగపడనుంది.

నీటి వినియోగంలో ఆల్టర్నేటివ్ వెట్టింగ్ అండ్ డ్రైయింగ్ (AWD) విధానాన్ని అమలు చేసి, చివరి ఎకరం వరకు నీరందేలా చూస్తామని సాగునీటి సంఘాల ప్రతినిధులు తెలిపారు. నవంబర్ 15 తర్వాత వచ్చే తుఫాన్ల ప్రభావం నుంచి పంటలను కాపాడుకోవడానికి ప్రభుత్వం ఈ ముందస్తు నీటి విడుదలకు శ్రద్ధ తీసుకుంది.

జలవనరుల శాఖ మంత్రి నిమ్మల రామానాయుడు జూలై 7 రాత్రి 60 వేల క్యూసెక్కుల గోదావరి ప్రవాహం రావడంతో వెంటనే పంపులు ప్రారంభించాలని ఆదేశించారు. దీంతో రైతులు ఆయనకు, ప్రభుత్వానికి కృతజ్ఞతలు తెలిపారు.