విశాఖలో కాలుష్య నియంత్రణపై ఎంపీ భరత్ సమీక్ష; 120 మైక్రాన్ల కంటే తక్కువ ప్లాస్టిక్ బ్యాగులపై నిషేధం

విశాఖపట్నం నగరంలో పెరుగుతున్న కాలుష్యాన్ని నియంత్రించేందుకు ఎంపీ శ్రీ భరత్ సమీక్ష నిర్వహించారు. జిల్లా కలెక్టరేట్లో జరిగిన ఈ సమావేశంలో పలు కీలక నిర్ణయాలు తీసుకున్నారు.

పీసీబీ బోర్డు చైర్మన్ కృష్ణయ్య, కలెక్టర్ అభిషిక్ కిషోర్, ఎమ్మెల్యేలు పల్లా శ్రీనివాసరావు, గణబాబు, విష్ణుకుమార్ రాజు తదితరులు ఈ సమీక్షలో పాల్గొన్నారు. కాలుష్య నియంత్రణ, వ్యర్ధాల నిర్వహణ, గాలి-నీటి నాణ్యత పరిరక్షణ, పారిశ్రామిక నిబంధనల అమలు తదితర అంశాలపై చర్చించారు.

నగరంలో గాలి నాణ్యత సూచికను నిరంతరం పర్యవేక్షించాలని ఎంపీ సూచించారు. దీనికోసం మూడు అదనపు ఎయిర్ క్వాలిటీ మానిటరింగ్ కేంద్రాలు ఏర్పాటు చేయాలని ఆదేశించారు. 120 మైక్రాన్ల కంటే తక్కువ మందం ఉన్న ప్లాస్టిక్ క్యారీ బ్యాగుల వినియోగాన్ని పూర్తిగా నిషేధించాలని స్పష్టం చేశారు.

రెడ్ కేటగిరీ పరిశ్రమలను మరింత బాధ్యతగా వ్యవహరించాలని, నిబంధనలు పాటించే సంస్థలను అభినందిస్తామని, ఉల్లంఘించే వారిపై జరిమానాలు, చట్టపరమైన చర్యలు తీసుకుంటామని ఎంపీ హెచ్చరించారు. కాలుష్య నివారణలో రాజీ పడేది లేదని స్పష్టం చేశారు.