బ్యాంకులు, ఏటీఎంలలో ‘నో క్యాష్’ బోర్డులు: నగదు కొరతతో కస్టమర్ల ఇబ్బంది

దేశంలోని పలు ప్రాంతాల్లో బ్యాంకులు, ఏటీఎంలు ‘నో క్యాష్’ (నగదు లేదు) బోర్డులు ప్రదర్శిస్తున్నాయి. కేంద్ర ప్రభుత్వం ఇటీవల డిజిటల్ లావాదేవీలను ప్రోత్సహించే ఆదేశాలు జారీ చేయడంతో బ్యాంకులు నగదు లావాదేవీల కంటే ఆన్‌లైన్ ట్రాన్సాక్షన్లపై దృష్టి పెట్టాలని సూచించినట్లు సమాచారం.

బ్యాంకు కౌంటర్లలో డబ్బులు అడిగిన వినియోగదారులకు గరిష్టంగా ₹10,000 నుంచి ₹20,000 మాత్రమే ఇస్తామని, కొన్ని చోట్ల ₹50,000 వరకు అనుమతిస్తున్నామని సిబ్బంది చెబుతున్నారు. అంతకంటే ఎక్కువ నగదు కావాలంటే ముందు రోజే కారణం వివరించాలని సూచిస్తున్నారు. ఏటీఎంలలో కూడా నగదు నిల్వలు తగ్గడంతో ‘నో క్యాష్’ సంకేతాలు కనిపిస్తున్నాయి.

ముఖ్యంగా గ్రామీణ ప్రాంతాల్లో ఈ పరిస్థితి మరింత ఇబ్బందికరంగా మారుతోంది. ఆన్‌లైన్ లావాదేవీలకు తగిన సౌకర్యాలు లేని చిన్న వ్యాపారులు, రైతులు, దినసరి కూలీలు నగదు కొరతతో తీవ్ర అవాంతరాలు ఎదుర్కొంటున్నారు. డిజిటల్ ట్రాన్సాక్షన్లతో పాటు బ్యాంకుల్లో తగినంత నగదు కూడా ఉండాలని పలువురు కస్టమర్లు డిమాండ్ చేస్తున్నారు.

ఈ విషయంపై కేంద్ర ప్రభుత్వం, బ్యాంకులు ఎలాంటి నిర్ణయం తీసుకుంటాయో వేచి చూడాలి.