కూటమి ప్రభుత్వం చేస్తున్న మంచి పనులపై వైసీపీకి కడుపు మంట: TDP పట్టాభి రామ్

TDP నేత పట్టాభి రామ్ వైసీపీపై తీవ్రంగా విరుచుకుపడ్డారు. కూటమి ప్రభుత్వం చేస్తున్న అభివృద్ధి పనులపై వైసీపీకి కడుపు మంట కలుగుతోందని ఆయన ఆరోపించారు. చంద్రబాబు నాయుడు, నారా లోకేష్, నరేంద్ర మోడీ, పవన్ కళ్యాణ్ కృషి వల్ల రాష్ట్రం అన్ని రంగాల్లో దూసుకుపోతోందని పట్టాభి రామ్ తెలిపారు. దక్షిణ కొరియాలో నారా లోకేష్ చేస్తున్న కృషి ద్వారా పెట్టుబడుల విప్లవం జరుగుతోందని, 20 లక్షల ఉద్యోగాల హామీ నెరవేరే దిశగా ప్రభుత్వం పని చేస్తోందని ఆయన స్పష్టం చేశారు. ప్రతి నెల ఒకటవ తేదీన టంచనగా పెన్షన్లు అందుతున్నాయని, అనేక సంక్షేమ పథకాల ద్వారా ప్రజలు లబ్ధి పొందుతున్నారని పట్టాభి రామ్ పేర్కొన్నారు. ఇలాంటి సానుకూల పరిస్థితిలో వైసీపీ సమాజంలో అశాంతి సృష్టించాలని కుట్రలు పన్నుతోందని ఆయన ఆరోపించారు. జగన్ రెడ్డి తన వ్యక్తిగత న్యాయవాది పొన్నవల సుధాకర్ రెడ్డిని రంగంలోకి దింపారని పట్టాభి రామ్ అన్నారు. గత ఎన్నికల్లో 151 స్థానాల నుండి 11 స్థానాలకు పడిపోయిన వైసీపీ రాజకీయ చిత్రపటంలో స్థానం కోల్పోతుందని హెచ్చరించారు. దేశభద్రతకు, సార్వభౌమాధికారానికి సవాలు విసిరే వ్యక్తులను సమర్థించే వారిపై చట్టపరమైన చర్యలు తీసుకుంటామని పట్టాభి రామ్ స్పష్టం చేశారు. వైసీపీ నాయకుల అసలు రంగు ప్రజలకు బయటపెట్టేందుకే ఈ మీడియా సమావేశం నిర్వహించామని ఆయన తెలిపారు.