కేంద్ర మంత్రి అశ్విని వైష్ణవ్ నేడు తెలంగాణలో పర్యటన; మేధా రైల్ కోచ్ ఫ్యాక్టరీ, సర్వో డ్రైవ్ సందర్శన

కేంద్ర రైల్వే, కమ్యూనికేషన్స్, ఐటి శాఖ మంత్రి అశ్విని వైష్ణవ్ నేడు తెలంగాణలో పర్యటిస్తున్నారు. ఆదివారం ఉదయం 10:30 గంటలకు హైదరాబాద్ మాదాపూర్ లోని నోవటెల్ హోటల్‌లో ఐటీ రంగ నిపుణులు, పారిశ్రామికవేత్తలు, స్టార్టప్ ప్రతినిధులతో సమావేశం నిర్వహించనున్నారు. దేశీయ సాంకేతికత, రైల్వేల ఆధునీకరణ, వినూత్న టెక్నాలజీల వినియోగంపై చర్చించనున్నారు.

మధ్యాహ్నం 2 గంటలకు రంగారెడ్డి జిల్లా శంకరపల్లి మండలం కొండకల్ గ్రామంలోని మేధా రైల్ కోచ్ ఫ్యాక్టరీని సందర్శిస్తారు. రూ.1000 కోట్ల పెట్టుబడితో ఏర్పాటైన ఈ ఫ్యాక్టరీ దేశంలోనే అతిపెద్ద ప్రైవేట్ రంగ రైల్వే కోచ్ తయారీ కేంద్రం. వందే భారత్ ఎక్స్‌ప్రెస్, మెట్రో రైళ్లకు అవసరమైన అత్యాధునిక కోచ్‌లను ఇక్కడ ఉత్పత్తి చేస్తున్నారు.

సాయంత్రం 4 గంటలకు సమీపంలోని మేధా సర్వో డ్రైవ్ ఫ్యాక్టరీని సందర్శిస్తారు. భారతీయ రైల్వేలకు ప్రొపల్షన్ పరికరాలను సరఫరా చేయడంలో ఈ సంస్థ అగ్రగామి. దేశీయంగా అభివృద్ధి చెందిన కవచ్ రైలు రక్షణ వ్యవస్థ, భారతదేశపు తొలి హైడ్రోజన్ ఇంధన రైళ్ల తయారీలో కీలక సేవలు అందిస్తోంది. మంత్రి ఇక్కడ ప్రగతిని సమీక్షించనున్నారు.

తెలంగాణపై దృష్టి సారించిన బీజేపీ నాయకులు ఇటీవల హైదరాబాద్‌లో వరుస పర్యటనలు చేస్తున్నారు. ఈ నెల 8న బీజేపీ చీఫ్ నితిన్ నబీన్, 9న కేంద్ర ఆరోగ్య శాఖ మంత్రి జేపీ నడ్డా హైదరాబాద్ పర్యటించారు. అశ్విని వైష్ణవ్ పర్యటన కూడా ఇందులో భాగమే.