నెల్లూరు ఆల్లిపురం కుసుమాంబ 15 ఏళ్లుగా నిత్య అన్నదానం; ‘డొక్కా సీతమ్మ’గా గుర్తింపు

నెల్లూరు జిల్లా ఆల్లిపురంలో నివసించే ఎడవల్లి కుసుమాంబ (68) గత 15 ఏళ్లుగా రోజూ పేద ప్రజలకు ఉచిత భోజనం అందిస్తున్నారు. ఎవరైనా ఇంటికి వచ్చి ఆకలని చెప్పగానే వెంటనే వండి, ప్రేమగా వడ్డిస్తారు.

వేసవిలో చెప్పులు, వర్షాకాలంలో గొడుగులు, పేద మహిళలకు చీరలు, స్కూలు పిల్లలకు నోట్బుక్స్, పుస్తకాలు ఉచితంగా అందిస్తారు. ముగ్గురు పిల్లలు తన నెలవారీ ఖర్చుల కోసం ఇచ్చే రూ.20,000 మొత్తాన్ని ఈ సేవాకార్యక్రమాలకే వినియోగిస్తున్నారు. భర్త రఘురామయ్య రిటైర్డ్ ప్రభుత్వోద్యోగి, ఆయన కూడా భార్యకు సహకారంగా ఉంటూ పెన్షన్ డబ్బులనూ సేవకు కేటాయిస్తున్నారు.

ప్రారంభంలో కలకండ ప్రసాదంగా పంచడంతో చిన్నారులు ఈమెను ‘కలకండ అవ్వా’ అని ముద్దుగా పిలుస్తుంటారు. ఇటీవల సర్వేపల్లి ఎమ్మెల్యే సోమిరెడ్డి చంద్రమోహన్ రెడ్డి కుసుమాంబ ఇంటికి వెళ్లి దంపతులను సత్కరించారు. సోషల్ మీడియాలో ఈమెను ‘నెల్లూరు డొక్కా సీతమ్మ’గా అభివర్ణించడంతో ఆల్లీపురం కుసుమాంబ విస్తృత గుర్తింపు పొందారు. డొక్కా సీతమ్మ స్ఫూర్తితోనే ఈ సేవ కొనసాగిస్తున్నారు.