గోదావరి పుష్కరాలకు ₹585 కోట్లు; రాజమహేంద్రవరం ఘాట్లను మంత్రులు పరిశీలించారు

రాజమహేంద్రవరంలో గోదావరి పుష్కర ఘాట్లను మంత్రులు నారాయణ, దుర్గేష్ పరిశీలించారు. వారితో పాటు ఎమ్మెల్యేలు గోరంట్ల బుచ్చయ్య, ఆదిరెడ్డి వాసు, ఎమ్మెల్సీ సోము వీర్రాజు ఉన్నారు.

పుష్కరాల కోసం మున్సిపల్ శాఖ నుండి ₹585 కోట్లు కేటాయించినట్టు మంత్రులు తెలిపారు. అన్ని శాఖల సమన్వయంతో కార్యాచరణ ప్రణాళిక సిద్ధం చేస్తున్నామని చెప్పారు.

గత పుష్కరాలలో 4.80 లక్షల మంది వచ్చారు. ఒక రోజు 60 లక్షల మంది దర్శించారు. ఈసారి ఒక రోజు ఒక కోటి మంది భక్తులు వస్తారని అంచనా వేస్తున్నామని వెల్లడించారు.

శానిటేషన్ కోసం గతంలో 8,000 మంది నియమించగా, ఈసారి 15,000 మంది అవసరమని చెప్పారు. పోలీస్ 30,000 మందిని వినియోగించనున్నట్టు తెలిపారు. వసతి, పార్కింగ్, రవాణా వంటి ఇతర ఏర్పాట్లపై మంత్రుల బృందం చర్చించింది.

టూరిజం, ఇరిగేషన్, ఎండోమెంట్స్, పంచాయతీరాజ్ శాఖల సమన్వయంతో ఘాట్ల వద్ద కాంక్రీట్ పనులు చేపట్టాలని నిర్ణయించారు. భద్రతా ప్రమాణాలతో పుష్కరాలు నిర్వహించేందుకు ప్రభుత్వం చర్యలు తీసుకుంటోందని మంత్రులు పేర్కొన్నారు.