ఏపీ డిప్యూటీ సీఎం పవన్ కల్యాణ్ కేరళలో 20 రోజుల ఆయుర్వేద చికిత్సకు

ఏపీ డిప్యూటీ సీఎం, జనసేన అధ్యక్షుడు పవన్ కల్యాణ్ ఇవాళ కేరళ పర్యటనకు వెళ్తున్నారు. కేరళలోని ఆయుర్వేద ప్రకృతి వైద్య చికిత్స కేంద్రంలో 20 రోజుల పాటు ప్రత్యేక చికిత్స తీసుకోనున్నారు.

ఇటీవల ఆయన భుజానికి సంబంధించిన ఆపరేషన్ జరిగింది. శస్త్రచికిత్స నుంచి పూర్తిగా కోలుకోవడం, వెన్ను కండరాల నొప్పుల నుంచి ఉపశమనం కోసం కేరళ సాంప్రదాయ ఆయుర్వేద చికిత్స సరైన పరిష్కారమని నిపుణులు సూచించారు. ఈ నేపథ్యంలో ఆయన సమగ్ర రికవరీ కోర్సు పూర్తి చేయాలని నిర్ణయించారు.

చికిత్స సమయంలో నాడీ వ్యవస్థ, శరీర ఆరోగ్య సమతుల్యత పునరుద్ధరణ కోసం ప్రత్యేక థెరపీలు తీసుకుంటారు. ఈ 20 రోజుల్లో పవన్ కల్యాణ్ బహిరంగ కార్యక్రమాలకు, రాజకీయ భేటీలకు దూరంగా ఉంటారు. అత్యవసర శాఖాపరమైన ఫైళ్లను మాత్రం ఆన్లైన్ ద్వారా లేదా వ్యక్తిగత సిబ్బంది సహాయంతో పర్యవేక్షిస్తారని సమాచారం.

కొంతకాలంగా పని ఒత్తిడి, వాతావరణ మార్పుల కారణంగా ఆయన వైరల్ ఫీవర్, స్పాండిలైటిస్, శ్వాసకోశ సమస్యలతో ఇబ్బంది పడుతున్నారు. గతంలోనూ జ్వరం, శారీరక అలసట కారణంగా కొన్ని పర్యటనలు, సమీక్షలు వాయిదా వేశారు. చికిత్స పూర్తి చేసుకుని సంపూర్ణ ఆరోగ్యంతో తిరిగి వచ్చిన తర్వాత డిప్యూటీ సీఎం బాధ్యతల్లో పాల్గొంటారు.