సీడ్ బాల్స్ పంపిణీ వేగవంతం చేయాలని అటవీ శాఖ అధికారులకు డిప్యూటీ సీఎం పవన్ కల్యాణ్ సూచన

రాష్ట్రంలో సీడ్ బాల్స్ పంపిణీ కార్యక్రమాన్ని వేగవంతం చేయాలని ఉపముఖ్యమంత్రి పవన్ కల్యాణ్ అటవీ శాఖ అధికారులను ఆదేశించారు.

అటవీ శాఖ ఉన్నతాధికారులతో క్యాంపు కార్యాలయంలో సమీక్షించిన పవన్ కల్యాణ్, డ్రోన్ సాంకేతికతను మరింత విస్తృతంగా వినియోగించుకోవాలని సూచించారు. అడవులు క్షీణించిన ప్రాంతాల్లో సీడ్ బాల్స్ వేగంగా వెదజల్లేందుకు అదనపు డ్రోన్లను ఉపయోగించాలన్నారు.

అధికారుల నివేదిక ప్రకారం, ఇప్పటివరకు 3 కోట్లకు పైగా సీడ్ బాల్స్ తయారు చేయగా, వీటిలో 63 లక్షలకు పైగా సీడ్ బాల్స్‌ను సుమారు 6,500 హెక్టార్ల విస్తీర్ణంలో వెదజల్లారు. మానవులు చేరుకోవడం కష్టమైన అటవీ ప్రాంతాల్లో డ్రోన్ ద్వారా పంపిణీ సులభమవుతుందని అధికారులు తెలిపారు. ప్రస్తుతం చింతూరు, పీటీ ఆత్మకూరు, గిద్దలూరు, మార్కాపురం, కడప డివిజన్లలో డ్రోన్లతో సీడ్ బాల్స్ వెదజల్లుతున్నారు.

రాష్ట్రంలో 50% గ్రీన్ కవర్ లక్ష్యాన్ని సాధించడంలో సీడ్ బాల్స్ కీలకమని పవన్ కల్యాణ్ అన్నారు. ఈ లక్ష్యాన్ని ఏ అధికారీ నిర్లక్ష్యం చేయకూడదని స్పష్టం చేశారు.