BRS MLA పెద్ది సుదర్శన్ రెడ్డి ఆరోగ్యం విషమం; వెంటిలేటర్‌పై చికిత్స

నర్సంపేట BRS ఎమ్మెల్యే పెద్ది సుదర్శన్ రెడ్డి ఆరోగ్య పరిస్థితి విషమంగా కొనసాగుతోంది. ఆదివారం ఉదయం 7:30 గంటలకు హనుమకొండలోని తన నివాసంలో గుండెపోటు రావడంతో ఆయనను స్థానిక ప్రైవేటు ఆసుపత్రికి తరలించారు. తీవ్రమైన స్థితిలో ఉన్న ఆయన ప్రాణాలు కాపాడేందుకు వైద్యులు అత్యవసర చికిత్సలు అందించారు.

గుండె కొట్టుకునేలా చేయడంలో వైద్యులు విజయం సాధించిన తర్వాత, మెరుగైన చికిత్స కోసం ఆయనను సికింద్రాబాద్‌లోని యశోదా ఆసుపత్రికి తరలించారు. ప్రస్తుతం వెంటిలేటర్ సాయంతో శ్వాస అందిస్తున్నారు. గుండె కొట్టుకుంటున్నప్పటికీ ఇతర అవయవాలు ఇంకా పూర్తిగా కోలుకోలేదు. ఊపిరితిత్తుల్లో ఇన్ఫెక్షన్, రక్తం గడ్డకట్టడం, మెదడుకు రక్త ప్రసరణ లోపం వంటి సమస్యలు కొనసాగుతున్నాయి. దీంతో ఆయన స్పృహలోకి రాలేదు. మాటలకు, నొప్పికి స్పందించడం లేదు.

వైద్యులు న్యూరాలజికల్ రీఅసెస్మెంట్ చేస్తున్నారు. శ్వాస ఆడడం, గుండె కొట్టుకోవడం మాత్రమే సానుకూల అంశాలుగా ఉన్నాయి. అన్ని అవయవాలకు సంబంధించిన సీనియర్ వైద్యులు చికిత్స కొనసాగిస్తున్నారు. కానీ, శరీరం సంపూర్ణంగా స్పందించడానికి మరింత సమయం పడుతుందని వైద్యులు తెలిపారు.

ఆసుపత్రిలో కుటుంబ సభ్యులు, BRS నాయకత్వం, అభిమానులు, నియోజకవర్గ ప్రజలు పెద్ద సంఖ్యలో గుమిగూడి ఆయన ఆరోగ్యం గురించి ఆరా తీస్తున్నారు. ప్రస్తుత స్థితిలో కోలుకోవడానికి సమయం పడుతుందని, తక్షణ మార్పులు ఉండవని డాక్టర్లు చెబుతున్నారు. ఆయన ఆరోగ్యంపై అప్‌డేట్లు ఇంకా ఎదురుచూస్తున్నాయి.