ఆదిలాబాద్‌లో పెన్గంగ నది ఉగ్రరూపం: రాకపోకలు నిలిచివేత, పంట నష్టం

తెలంగాణ, మహారాష్ట్ర సరిహద్దులోని పెన్గంగ నది భారీ వర్షాల కారణంగా ఉగ్రరూపం దాల్చింది. ఆదిలాబాద్ జిల్లా జైనద్ మండలం ఆనందపూర్ వంతెనపై నీరు ప్రవహిస్తుండటంతో రెండు రాష్ట్రాల మధ్య రాకపోకలు పూర్తిగా నిలిచిపోయాయి.

పోలీసులు ట్రాక్టర్ అడ్డుపెట్టి వాహనాల రాకపోకలను నియంత్రించారు. తెల్లవారుజాము నుంచే ఈ పరిస్థితి కొనసాగుతోంది. నదీ ప్రవాహం అంతకంతకు పెరుగుతుండటంతో ఆనందపూర్, పెండల్వాడ ప్రాంతాల్లోని పంటపొలాలు బ్యాక్ వాటర్‌తో మునిగిపోతున్నాయి. సోయా, పత్తి, జొన్న పంటలు నీట మునిగాయని రైతులు చెప్పారు. ఇటీవలే కురిసిన వర్షాలతో నదిలో అమర్చిన మోటార్లు కొట్టుకుపోయాయి.

మరో రెండు రోజుల పాటు వర్షాలు కురిసే అవకాశం ఉన్నందున అధికార యంత్రాంగం అప్రమత్తమైంది. ఆదిలాబాద్ జిల్లాలో విద్యాసంస్థలకు సెలవు ప్రకటించారు. వాగులు, వంకల వద్దకు వెళ్లవద్దని సూచించారు.

ఆదిలాబాద్, నిర్మల్, కొమరం భీం, మంచిర్యాల జిల్లాల్లో 10 సెంటీమీటర్లకు పైగా వర్షపాతం నమోదైంది. కడెం, స్వర్ణ, మత్తడివాగు, సాత్నాల, వట్టివాగు ప్రాజెక్టుల్లోకి ఇన్‌ఫ్లో కొనసాగుతోంది. ప్రతి ఏటా వరదలతో ఇబ్బందులు ఎదురవుతున్నాయని స్థానికులు ఆందోళన వ్యక్తం చేస్తున్నారు.