ఫిలిపీన్స్‌తో బ్రహ్మోస్ రెండో దశ ఒప్పందం.. ₹7,100 కోట్లకు 60 క్షిపణులు

ఫిలిపీన్స్ తన నావికాదళం కోసం భారతదేశం నుంచి మరో విడత బ్రహ్మోస్ క్షిపణులను కొనుగోలు చేసేందుకు సిద్ధమవుతోంది. మనీలా, న్యూ ఢిల్లీ మధ్య ఈ రెండో దశ ఒప్పందంపై చర్చలు చివరి దశకు చేరినట్లు సమాచారం.

₹7,100 కోట్ల బడ్జెట్‌తో 60 క్షిపణులు, ఐదు కొత్త బ్రహ్మోస్ లాంచర్ సిస్టమ్స్ కొనుగోలు చేయాలని ఫిలిపీన్స్ యోచిస్తోంది. తన ఆపరేషనల్ అవసరాలకు తగ్గట్టు క్షిపణిలో కొన్ని మార్పులు చేయాలని కూడా అది కోరినట్లు నివేదికలు తెలుపుతున్నాయి. ఈ ఒప్పందంపై ఇరు దేశాల ప్రభుత్వాల అధికారిక ప్రకటన ఇంకా వెలువడలేదు.

2022లో ఫిలిపీన్స్ తొలి విడతగా 375 మిలియన్ డాలర్లకు బ్రహ్మోస్ వ్యవస్థను కొనుగోలు చేసి నావికాదళంలో చేర్చుకుంది. ఇప్పుడు కుదుర్చుకోబోతున్న ఒప్పందం విలువ దానికంటే దాదాపు రెట్టింపు. దక్షిణ చైనా సముద్రంలో చైనాతో ఫిలిపీన్స్‌కు వివాదాలు ఉన్నాయి. ఈ నేపథ్యంలో అధ్యక్షుడు ఫెర్డినాండ్ మార్కోస్ జూనియర్ హయాంలో ఫిలిపీన్స్ తన రక్షణ సామర్థ్యాలను పెంచుకుంటోంది.

బ్రహ్మోస్ క్షిపణిని భారత్, రష్యా కలిసి అభివృద్ధి చేశాయి. ఇది సూపర్‌సోనిక్ క్రూయిజ్ క్షిపణి. శబ్దం కంటే దాదాపు మూడు రెట్లు వేగంతో ఇది దూసుకెళ్తుంది. సముద్రంలోని యుద్ధ నౌకలు, తీర ప్రాంత లక్ష్యాలపై దీన్ని ప్రయోగించవచ్చు.

భారత రక్షణ ఎగుమతులు 2025-26 ఆర్థిక సంవత్సరంలో 62 శాతం పెరిగి ₹38,424 కోట్లకు చేరుకున్నాయని నివేదికలు పేర్కొంటున్నాయి. ఫిలిపీన్స్‌తో పాటు ఇండోనేషియా, వియత్నాం బ్రహ్మోస్ కోసం ఆసక్తి చూపుతున్నాయి. UAE, థాయిలాండ్, బ్రెజిల్‌తో చర్చలు జరుగుతున్నాయి.