ఫోన్ ట్యాపింగ్ కేసు: రిటైర్డ్ డీజీపీని సాక్షిగా చేర్చనున్న సిట్

ఫోన్ అక్రమ ట్యాపింగ్ కేసు దర్యాప్తులో సిట్ కీలక నిర్ణయం తీసుకుంది. అనుబంధ అభియోగ పత్రం దాఖలు చేసేందుకు సిద్ధమవుతున్న సిట్, ఓ రిటైర్డ్ డీజీపీని, మరో సీనియర్ అధికారిని కీలక సాక్షులుగా చేర్చే దిశగా అడుగులు వేస్తోంది. ఈ ఇద్దరు అధికారులు గత ప్రభుత్వంలో ఉన్నతస్థాయి బాధ్యతలు నిర్వహించారు.

కేసులో ప్రధాన నిందితుడు ప్రభాకర్ రావు, ఫోన్ ట్యాపింగ్ ఉన్నతాధికారుల ఆదేశాల మేరకు జరిగిందని విచారణ సమయంలో పదే పదే చెప్పినట్లు సిట్ వర్గాలు తెలిపాయి. ఈ నేపథ్యంలో ముగ్గురు బీఆర్ఎస్ ప్రముఖులపై అభియోగాలు మోపడానికి ఈ సాక్ష్యం అవసరమని సిట్ భావిస్తోంది. ఇప్పటికే ముగ్గురు బీఆర్ఎస్ నాయకులను నిందితులుగా చేర్చాలని సిట్ నిర్ణయించినట్లు సమాచారం.

ఈ ఇద్దరు అధికారులు అక్రమ ట్యాపింగ్ను నియంత్రించడంలో విఫలమయ్యారనే వాదనలు కూడా తెరపైకి వచ్చాయి. వారి వాంగ్మూలాలు నమోదు చేస్తే, కేసులో కీలక విషయాలు వెలుగులోకి వచ్చే అవకాశం ఉందని సిట్ భావిస్తోంది. త్వరలో వారి వాంగ్మూలాలు సేకరించి, అనుబంధ అభియోగ పత్రం దాఖలు చేస్తామని సిట్ అధికారులు తెలిపారు.