జనగణన వివరాలను మొబైల్‌తో స్వయంగా నమోదు చేసుకోవచ్చు: ప్రధాని మోదీ

దేశవ్యాప్తంగా జరుగుతున్న జనగణన ప్రక్రియలో పౌరులు తమ వివరాలను మొబైల్ ఫోన్ ద్వారా స్వయంగా డిజిటల్‌గా నమోదు చేసుకునే అవకాశం ఉంటుందని ప్రధాని నరేంద్ర మోదీ ప్రకటించారు. ఢిల్లీలోని ఎర్రకోట వేదికపై 80వ స్వాతంత్ర్య దినోత్సవం సందర్భంగా ఆయన ఈ విషయం చెప్పారు.

జనగణన అనేది కేవలం సంఖ్యల సేకరణ మాత్రమే కాదని, ఆ వివరాల ఆధారంగానే ప్రభుత్వ విధానాలు, సంక్షేమ పథకాలు, దేశాభివృద్ధి ప్రణాళికలు రూపొందుతాయని ఆయన వివరించారు. అందుకే కచ్చితమైన సమాచారం ఉండటం చాలా అవసరమని పేర్కొన్నారు.

గతంలో ప్రభుత్వ ప్రతినిధులు ఇంటింటికీ వచ్చి వివరాలు సేకరించేటప్పుడు తొందరలో పేర్ల స్పెల్లింగ్ తప్పుగా రాసే అవకాశం ఉండేదని, దానివల్ల చివరకు సరైన ఫలితాలు రావడంలో ఇబ్బందులు ఎదురయ్యాయని ప్రధాని చెప్పారు. ప్రస్తుతం టెక్నాలజీ అందుబాటులో ఉన్నందున ఈసారి ప్రజలు తమ జనగణన వివరాలను మొబైల్ ఫోన్ నుంచి స్వయంగా నింపుకునే నిర్ణయం తీసుకున్నట్లు తెలిపారు.

కుటుంబ సభ్యులంతా కలిసి కూర్చొని ముందుగా కాగితంపై ఫారమ్ నింపాలని, తప్పులుంటే సరిచేసుకున్న తర్వాత డిజిటల్‌గా అప్‌లోడ్ చేయాలని ఆయన సూచించారు. తర్వాత ప్రభుత్వ ప్రతినిధులు వచ్చి చర్చిస్తారని, కానీ కుటుంబం ముందే డిజిటల్ రిజిస్ట్రేషన్ పూర్తి చేస్తే స్పెల్లింగ్ తప్పులు, సమాచార లోపాలు ఉండవని వివరించారు.

సరైన సమాచారం ఇస్తే దేశం ముందుకు సాగడానికి పెద్ద ఎత్తున సహాయం జరుగుతుందని, యువత కుటుంబ సభ్యులకు ఫారమ్ నింపడంలో సహాయం చేయాలని ప్రధాని కోరారు. జనగణన పనిలో యువత చురుగ్గా పాల్గొనాలని ఆయన విజ్ఞప్తి చేశారు.