దేశ భవిష్యత్తు కోసం దీర్ఘకాలిక ప్రణాళికలు రూపొందించాలని ప్రధాని మోడీ సూచన

ప్రధాని నరేంద్ర మోడీ కేంద్ర ప్రభుత్వ కార్యదర్శులతో ఉన్నత స్థాయి సమావేశం నిర్వహించారు. దేశ భవిష్యత్తు అవసరాలకు అనుగుణంగా దీర్ఘకాలిక ప్రణాళికలు రూపొందించాలని అధికారులకు సూచించారు.

ఈ సమావేశంలో మౌలిక వసతులు, కనెక్టివిటీ, భద్రత, విదేశాంగ వ్యవహారాలు, పాలన తదితర అంశాలపై భవిష్యత్ కార్యాచరణను సమీక్షించారు. ప్రభుత్వ శాఖల మధ్య కమ్యూనికేషన్ గ్యాప్ ఉండకూడదని ప్రధాని అన్నారు. ఇది కేవలం వ్యవస్థకు సంబంధించిన సమస్య కాదని, అధికారుల ఆలోచనా విధానానికి సంబంధించినదని పేర్కొన్నారు.

అధికారులు తమ బాధ్యతలను సొంతంగా భావించి పనిచేయాలని సూచించారు. కోవిడ్ మహమ్మారి, పశ్చిమాసియా సంక్షోభ సమయంలో వివిధ శాఖలు సమన్వయంతో పనిచేసిన తీరును మోడీ గుర్తు చేశారు. కృత్రిమ మేధను సమర్థంగా వినియోగించుకోవాలని ప్రధాని సూచించారు. అయితే మానవ జోక్యం, నిర్ణయ సామర్థ్యానికే ప్రాధాన్యం ఉండాలని స్పష్టం చేశారు.

డేటా అనేది భవిష్యత్తుకు కీలకమైన జాతీయ ఆస్తి అని మోడీ పేర్కొన్నారు. ప్రభుత్వ శాఖలు భారీగా డేటా సేకరిస్తున్నా, శాఖల మధ్య సమన్వయం లేకపోవడంతో పూర్తి ప్రయోజనం పొందలేకపోతున్నామని అన్నారు. విధానాల రూపకల్పనలో విశ్వవిద్యాలయాలు, యువతతో ప్రభుత్వ శాఖలు మరింత చర్చించాలని సూచించారు.

పరిశోధన, ఆవిష్కరణలకు ప్రాధాన్యం ఇవ్వాలని, ముఖ్యంగా రక్షణ రంగంలో పరిశోధన పెంచాలని ప్రధాని అన్నారు. భారత్ రక్షణ పరిశ్రమను బలోపేతం చేసి ప్రపంచ స్థాయిలో పోటీ పడేలా చేయాలని అన్నారు. రక్షణ రంగంలో కొత్త కోర్సులు, మానవ వనరుల అభివృద్ధిపై దృష్టి పెట్టాలని సూచించారు. Whole of Government విధానంతో శాఖల మధ్య సమన్వయం, సమిష్టి బాధ్యతతో సవాళ్లను ఎదుర్కోవాలని పిలుపునిచ్చారు.