భోగాపురం విమానాశ్రయాన్ని ఆగస్టు 1న ప్రారంభించనున్న ప్రధాని మోదీ; రాష్ట్ర ప్రభుత్వం 10 కోట్లు విడుదల

భోగాపురం వద్ద ఏర్పాటుచేస్తున్న అల్లూరి సీతారామరాజు అంతర్జాతీయ విమానాశ్రయాన్ని ఆగస్టు 1న ప్రారంభించేందుకు ప్రధాని నరేంద్ర మోదీ హాజరుకానున్నారు. రాష్ట్ర ప్రభుత్వం ఈ కార్యక్రమాన్ని ఘనంగా నిర్వహించేందుకు ఏర్పాట్లు చేస్తోంది.

ప్రధాని పర్యటన ఏర్పాట్ల కోసం రాష్ట్ర ప్రభుత్వం 10 కోట్ల రూపాయల నిధులు విడుదల చేసింది. కార్యక్రమాన్ని విజయవంతంగా నిర్వహించేందుకు మంత్రి నారా లోకేష్ ఆధ్వర్యంలో 11 మంది మంత్రులతో ఒక కమిటీని ఏర్పాటు చేసింది. ఈ కమిటీలో మంత్రులు సత్యకుమార్ యాదవ్, వంగలపూడి అనిత, కొండపల్లి శ్రీనివాస్ తదితరులు సభ్యులుగా ఉన్నారు.

ఈ సందర్భంగా అన్ని ఏర్పాట్లు సమన్వయంగా పూర్తికావాలని ప్రభుత్వం అధికారులను ఆదేశించింది. ప్రోటోకాల్ ఏర్పాట్లకు సంబంధించి సాధారణ పరిపాలన శాఖ జీవో నంబర్ 1449ను విడుదల చేసింది.

భోగాపురం విమానాశ్రయం అందుబాటులోకి వస్తే ఉత్తరాంధ్ర ప్రాంతంలో మౌలిక సదుపాయాలు, పారిశ్రామిక అభివృద్ధి, పర్యాటక రంగానికి ప్రయోజనం కలుగుతుందని రాష్ట్ర ప్రభుత్వం భావిస్తోంది.