ప్రధాని మోదీతో 20 స్పేస్ స్టార్టప్ వ్యవస్థాపకుల భేటీ; అంతరిక్ష సాంకేతికత విస్తృత వినియోగంపై చర్చ

ప్రధాని నరేంద్ర మోదీ స్పేస్ రంగంలో పనిచేస్తున్న 20 స్టార్టప్ వ్యవస్థాపకులతో సమావేశమయ్యారు. అంతరిక్ష సాంకేతికతను సామాన్యుల అవసరాలకు మరింత విస్తృతంగా వాడాలని ఈ భేటీలో ఆయన సూచించారు.

సమావేశంలో స్టార్టప్ వ్యవస్థాపకులు మాట్లాడుతూ, ప్రస్తుత కేంద్ర ప్రభుత్వం చాలా ముందుచూపుతో ఉందని, భారత స్పేస్ పాలసీ ప్రపంచంలోనే అత్యుత్తమమైన వాటిలో ఒకటని అభిప్రాయపడ్డారు. స్పేస్ రంగానికి ప్రధాని మోదీ నుంచి లభిస్తున్న మద్దతు అద్భుతంగా ఉందని చెప్పారు. విధానాలు అడ్డుగా లేవని, ఇప్పుడు స్టార్టప్లు, ఇతర కంపెనీలు గ్లోబల్‌గా పోటీపడే సామర్థ్యాన్ని నిర్మించుకోవాలని వారు తెలిపారు.

ప్రధాని మోదీ మాట్లాడుతూ, టెక్నాలజీ బాగుంది, కానీ దాన్ని సామాన్యుడి కోసం ఎలా ఉపయోగపడేలా చేయగలం అన్నదే అసలు ప్రశ్న అన్నారు. కొత్త రంగంలోకి దిగినందుకు వ్యవస్థాపకులను అభినందించారు. వారు ప్రభుత్వాన్ని విశ్వసించడమే అతిపెద్ద విషయమని చెప్పారు. ప్రభుత్వం తీసుకునే నిర్ణయాల్లో నిలకడగా ఉండాలని, పదే పదే మార్పులు చేయకూడదన్నది తన అభిప్రాయమని తెలిపారు. రిస్క్ తీసుకునేవారికి తమ తప్పు వల్ల ఏదైనా తేడా వచ్చినా ఎవరూ తమ చేయి వదిలిపెట్టరనే భరోసా ఉండాలని ఆయన అన్నారు.

ఈ భేటీలో అంతరిక్ష్ అనే వ్యవస్థాపకుడు మాట్లాడుతూ, తమ కంపెనీ భారతదేశపు తొలి స్పేస్ ఫార్మా స్టార్టప్ అని తెలిపారు. సహ వ్యవస్థాపకురాలు మోనికా కూడా అక్కడే ఉన్నారని చెప్పారు. అంతరిక్షంలోకి వెళ్లి ఔషధాలను తయారు చేసి వాటిని భూమికి తిరిగి తీసుకువచ్చే శాటిలైట్లను నిర్మిస్తున్నామని వివరించారు. ఆయన పేరు గురించి ప్రధాని అడగ్గా, అది తన తల్లి పెట్టిన పేరని చెప్పారు.